Alang Niadtong Lansiyang Namatay Daplin Sa Kalsadasinulat ni Mike LigaligNagtindog ako karon tungod sa imong gikahagsaan,
dalan labyanan sa daghang sakyanan.
Hapit na mongiob ang kalikopan.
Inig puli sa kangitngit sa adlaw
dili ka na hisiklapan nga gihaya sa kalsada.
Tingali inig kaugma madugmok ug malata
imong lawas inig tunob sa ligid
sa imong unod ug kabukogan
Nakita ko nga may dugo nga misugwak
gikan sa imong tilaok, gawas sa baba
naipon sa dila, mibasa sa balhibo sa imong ulo.
Nasayod ka ba nga Tagbilaran ni?
Wala unta ka mianhi dinhi.
Didto ka na lang unta nagpuyo
sa dakong bato taliwala sa dagat sa Anda
o kaha sa mga kalubihan sa Alona
o kaha sa mga kakahoyan sa Guindulman.
Asa na ang imong mga kauban?
Gibayaan ka ba sa tanan?
Kinsay molubong nimo?
Gawas kanako nga nagsulat ug balak,
anaa pa kahay maghandum kanimo?
Linkback:
https://tubagbohol.mikeligalig.com/index.php?topic=13230.0