Ako Unta Kadto: Ikaw Unta Kadtosinulat ni m. ligalig(in memory of the once beautiful love story of a Tubag Bohol friend)
Giampingan ko ang matag gihay sa atong gugma
Aron walay tamsi nga motuhak sa atong pagbati
Ug matagak - unya madunot ang atong sugilanon.
Gihimo ko ikawng dalan sa akong mga damgo
Diin didto sa unahan makita ko ikaw ug ako
Nga nagdaro sa kaumahan sa atong mga handumanan
Gihimo ko ikawng lapyahan sa akong baybayon
Aron ang hinaganas sa imong mga balod
Didto mosabak sa pungkay sa akong talidhay
Giampingan ko nga dili mapusgay ang imong mga saad
Nga gipugas sa kapanganoran sa akong handurawan
Aron ugma damlag mamunga ug kinabuhi ug kamatayon
Tungod sa kalapad sa akong pagpangga kanimo
Buot kong ihatag kanimo ang akong mga bulawan
Ug mga perlas nga mahukad lang ning lunhawng kalag
Buot unta akong mouban kanimo bisan asa ka moadto
Bisan moadto ka pa sa tumoy sa bangaw
Buot kong sundon ang imong animo
Buot ko untang ihalad kanimo ang akong paraiso
Diin ikaw mahimong prinsipe nga maghari
Sa tanang suok sa akong kasing-kasing
Apan ang kayo sa atong pagminahalay
Nahimong agipo ug uling nga gidauban sa luha
Kay naghaling ka ug lain nga abohan sa akong likod
Ug imong gikaingin ang tinubdan sa akong paglaum
Ang tanang buot kong buhaton ug ihatag kanimo
Imong giilisan ug gisalikway ug gihagdaw
Kay mikamang ka sa laing lapyahan ug darohan
Ug ako intawon nalumsan sa mga pagbangutan
Wala mo lingia ang kahayag nagsidlak ning mga mata
Ug didto ka naligo sa malamatong kangitngit
Ug nabutaan ka sa kidhat sa saag nga kalipay
Ug imong gitagbaw ang kahidlaw sa init nga kadlawon
Samtang ako nakuyapan sa kapait sa imong dila
Ug gilamat sa kahaguka sa gabok mong mga saad
Busa mikalagiw ako ngadto sa halayong yuta
Gilatas ang daghang dagat ug kabukiran
Aron dili ko na makita ang nagusbat tang hunasan
Ang mga katuigan nga malaya ang akong dughan
Mahimong hagdanan sa bag-o kong sinugdanan -
Ug ang gugmang napiskan sa apdo sa pagbudhi
Ako nang laksion sa panagway ning pagbati
Linkback:
https://tubagbohol.mikeligalig.com/index.php?topic=6446.0