Adunay Mga Balak Nga Magpabiling Tanghagasinulat ni Mike Ortega LigaligBisan ang paglibkas
sa imong pangalan
tunok sa iyang dila,
bato sa iyang baba...
unsa na kaha
ang pagsulat niini?
Hi there: mao lang kini
ang pulong nga napupho
human sa napulo
ka tuig nga nilabay
sukad nabugto ang talikala
sa saad ug panumpa,
kamatayon sa gugma
nga wala gani katagai
ug tukmang lubnganan
diha sa ngihib
sa alimpatakan...
Ang mga balak nahimugso
human siya gilabni
sa California
gikan sa imong mga bukton
nga kanhi nagsabwag
ug dagaang sa katugnaw
sa kadlawon...
dugay nitubo,
nilipang,
nilabang
sa hunasan
sa paghikalimot...
Adunay mga balak
angayan magpabiling
tanghaga
hangtud sa kahangtoran,
walay kinutoban
ang mga pangutana,
sinalikway, hangtod mopauli
sa pusod sa panahon,
walay pangalan...
Linkback:
https://tubagbohol.mikeligalig.com/index.php?topic=34359.0