MikeLigalig.com

Ni JEEPY P. COMPIO


MILAGRO kung makonsidera sa mga residente sa Pag-asa, Barangay 5-A, Bankerohan, dakbayan sa Davao, ang ilang kapilya sa Sto. Niño sa dapit human nga kini na lang ang nabilin nga wa gayud masunog niadtong Biyernes sa hapon.

Una niini, giingon ni Barangay 5-A, Bankerohan Kapitan Edgar Ibuyan Jr., nga nagsugod ang kalayo sa balay ni Estrella Lopez nga tupad ra sab sa kapilya.

"Base sa gisulti sa atoa sa BFP (Bureau of Fire Protection) nagsugod sa balay ni Estrella Lopez, diha lang gyud sa kapilya tapad," sulti ni Ibuyan Jr., sa eksklusibong pakighinabi sa Sun.Star SuperBalita Davao Sabado sa buntag.

Giingon nga nagagikan ang kalayo sa ika-duhang andana sa balay kinsa giingong dunay nagluto apan nabiyaan og didto na nagsugod ang kalayo nga daling mikanit sa Fish Bagsakan sa Pag-asa.

Mikabit sab ang kalayo sa Purok 5 daplin sa sapa, Purok 4 ug sa Purok 3, apan ang kapilya nga gipataliwalaan sa Fish Bagsakan sa Pag-asa ug sa mga Purok wa kini masunog.

"Ang Sto. Niño nga kapilya wa gyud masunog, then naa ta'y estimated nga 800 families sa 350 houses base na siya sa report sa atoa gikan sa BFP as of 7:00am today [Sabado]," dugang sa kapitan.

Lakip sa nasunog ang likod nga bahin sa gambalay sa 1950's nga LM Bakeshop sa Datu Bago Street.


Gipatik sa mantalaang Superbalita Davao Abril 16, 2016.

Linkback: https://tubagbohol.mikeligalig.com/index.php?topic=82207.0