Author Topic: Ania Ang Sumpay Sa Akong Sugilanon  (Read 1850 times)

pioneer

  • To God be the glory alone
  • FOUNDER
  • GURU
  • *****
  • Posts: 18911
  • stay at home
    • View Profile
    • spiritual preparation
Ania Ang Sumpay Sa Akong Sugilanon
« on: July 25, 2010, 12:47:13 AM »
Unsa Kaha Ug Mosulat Ko Sa Presidente?
by Mike O. Ligalig
published by the Bohol Standard

      Sa ako nang gikaingon sa niaging semana, dili ko na unta nga bukikion ug bulikaton ang baho nga sugilanon sa politika sa Anda apan napugos ako sa pagwiwi ug pagkulitog sa masakit nga kagahapon sa akong kinabuhi nga diin kinse ka tuig na ang nakalabay human gipalagpot ang akong amahan sa pagka-police tungod lang kay kining inyong ubos nga higala sa Tumoy Sa Bangaw, sa nag-edad pa siya ug disesayes anyos, wala nibotar sa SK chairman nga manok sa mayor sa among lungsod.

      Ug nangapkap ko ug tubag sa batan-on kong pangutana kaniadto: “Sala ba diay ang paggamit sa imong katungod pinasikad sa gasa sa demokrasya ug subay sa gilatid sa batakang balaod?”

      Pero unsay imong mahimo nga daghang politiko sa atong nasod wala kasabot ug unsay demokrasya?

      Human ko mautingkay ang maong masakit nga kaagi sa among pamilya nga napatik ning lindog sa Bangaw niaging semana, nagpusot-pusot ang mga e-mail nga akong nadawat, mga paisano ug paisana nga nagpuyo sa lain-laing suok sa kalibotan nipadangat sa ilang pahasubo ug kahisagmuyo sa salbahis nga politikanhong kaugmaran sa atong yutang natawhan.

      Wala diay ko nag-inusara sa paghambin sa mapait nga apdo sa pagpanglupig sa mga namunoan sa atong dapit.

      Dihay ni-email nako. Nagpaila lang ug Eduardo. Tua na nanimuyo sa Amerika sumala sa ‘from’ sa iyang e-mail. Ang iyang pamilya nahiagom usab sa kabangis sa pagpang-abuso sa politiko sa ilang lungsod.

      Bata pa intawon si Eduardo, walay hikabangkaagan unsa nang politika, sanglit dili man siya botante ug dili pa pud pwede irehistro kay lagi bayong-bayong pa kung namanok pa.

      Usa ka higayon niana, nakakuyog siya sa iyang amigo panahon sa kampanya sa eleksyon. Naunsa bang pagkabutanga nga pagkahuman sa piniliay, ang mama ni Eduardo nga maestra gipalagpot man sa mayor ngadto sa bukid. Once-a-week nalang intawon makauli iyang mama sa ilaha. Usa kini ka sakit nga panghitabo sa kinabuhi ni Eduardo nga hangtod karon lisod langkaton gikan sa iyang handurawan.

      Ug dinhi naabli ang sumpay sa akong sugilanon niaging semana. Niining higayona, ang akong iyaan, igsuon sa akong Papa (nipanaw na intawon niadtong 2007), usa ka midwife sulod na sa trayntay-tres (33) ang na-tripingan sa politiko sa among lungsod, ang samang pamunoan nga nagsakit ning ubos ninyong higala. Akong iyaan tua nilagpot sa bukid diin walay mga bata ug mga inahan nga iyang maalagaran.

      Plete paingon sa bukid, 150 pesos. Pabalik tugbong sakay sa habal-habal laing 150 pesos. Tagaktak ang 300 pesos sa akong iyaan sa usa lang ka adlaw.

      Asa naman intawon siya ug kan-on? Unsa namay matigom gikan sa iyang sweldo nga tua man nahurot sa plete sa habal-habal?

      Kapin singkwenta anyos na akong iyaan. Dugay nang panirbesyo sa gobyerno wala pa niabot nang naghari sa among lungsod karon.

      Ang mga tawo sa among baryo ug sa lungsod mismo nakahibawo gajud sa kakugihan sa akong iyaan sa pagpamakuna sa mga nag-uha-uha, pagpanabang sa mga buros nga manganakay, ug uban pang kalihokan sa panglawas.

      Kinsa may iyang bakonahan didto sa bukid? Mga di ingon nato?

      Mao lagi, ang mga naa sa gahom nagpatuyang lang ug paggamit sa ilang katungdanan aron matagbaw ang ilang kahinam sa panimawos human sa bugnong lugaynon. Bisan sa ilang kadaogan, mao gihapoy nagpasulabi sa ilang galamhan ang kaikag sa pagdagmal sa mga dili masukol nila.

      Unsa kaha ug mohangyo ko sa tabang ni Atty. Aleckoy Lim ug isumbong sa Ombudsman ning nahitabo sa akong iyaan? Unsa kaha kung mosulat ko sa Department of Justice ug Department of Health? Unsa kaha ug mamasin ko ug pakitabang sa opisina sa Presidente kung walay action ang Ombudsman?

      Kung kini man ang paagi nga masumpo ang linuog nga pamolitika ug mahaw-as ang akong iyaan gikan sa kasakit sa plete sa habal-habal, pilay palad ning kabos ninyong higala – ug dunggon sa Ginoo ang atong mga panghupaw ug pangaliyupo.

Note: this is a continuation of a previously written column found here: http://tubagbohol.mikeligalig.com/anda-bohol-philippines/political-abuse-in-anda-bohol/

Linkback: https://tubagbohol.mikeligalig.com/index.php?topic=30687.0
Romans 10:9
"That if you shall confess with your mouth the Lord Jesus, and shall believe in your heart that God has raised him from the dead, you shall be saved."
👇👇👇
Na-try mo na ba yung Tala app? Reliable sa unexpected expenses at laking tulong sa future! Use this code 9SO1TSL or visit www.tala.com to sign up!

unionbank online loan application low interest, credit card, easy and fast approval

Tags: