MikeLigalig.com

This was written before the election.
In support of Architect Bobby Cericos, I am revealing here some of my choices.

by www.mikeligalig.com

Kinsa Imong Botaran?

Bisan dili ko kampanyahon, mao ni ang pipila sa mga kandidato nga akong gituohan nga angayan moalagad sa katawhan.

Una sa tanan, sa akong lungsod sa Anda. Akong pilion si Flor Garcia. Nakahibawo naman ta tanan kung kinsa si Paul Amper ug ngano nga ang tawong naglantaw sa kaugmaon sa Anda dili gyud makabotar ni Amper.

Pagka-congressman sa ikatulong distrito: si Atty. Aleckoy Lim. Dili malalis ang pagkahigala namo ni Atty. Lim ug nasayod ako pag-ayo sa kinaiya niya: dili madinomtanon, sayon duolon, mahigalaon, mapainubsanon, matinabangon, maaghop ang kasing-kasing.

Nasayod ko nga ang mga nakaila ni Atty. Lim susama usab ug ipamahayag sa ako nang nasulti sa unahan. Andam usab ako mosaway sa akong mga higala kung aduna man akoy makit-an nga dili maayong binuhatan. Mao nga walay labot ang panaghigala isip basihan sa pagpili sa alagad sa katawhan.

Nganong dili ko makabotar ni Jala? Dili man sa ingon nga kung unsa ang punoan mao usab ang bunga. Ang ako lang gihuna-huna nga grabeha naman pud nako ka tonto kung mobotar ko ni Jala. Kamo nay mosumpay ana.
Nganong dili ko kabotar ni Balite? Bata pa ko sa Anda, nakaila na ko ni Balite. Akong lola kapitan sa among baryo sauna. Mao gitiman-an ko ang kinaiya aning tawhana. Kamo, nakahibawo man seguro mo sa akong ipasabot.

Nganong dili ko kabotar ni Rene? Hangtud nga mahatagan ug tin-aw ang misteryong nagpaluyo sa pagbaligya sa PPUD ngadto sa Salcon, dili ko kadawat nga si Rene ang mahimong congressman sa ikatulong distrito. Unsa naman kaha napoy ibaligya niya sa among distrito kung ma-congressman na siya?

Kinsay akong pilion pagka-gobernador?

Bobby Cericos akong gobernador. Kadaghan nako maka-estorya ni Bobby ug nakadayeg kaayo ko sa mga panglantaw aning tawhana.

Para gani nako si Bobby ang angayan mahimong presidente sa Pilipinas. Ang iyang mga huna-huna ug plano alang sa probinsya, kung suportaan lang sa pangagamhanan karon, mao ang makatabang sa paghaw-as nato sa kalisod. Kung si Bobby modagan man ug presidente sa Pilipinas, siya gayod ang akong pilion.

Pagka bise-gobernador: si Julius Herrera ang akong pilion. Wala man koy ikasaway ni Freda Tirol, apan para nako si Julius ang may labaw nga katakos mahimong bise-gobernador.

Kadaghan na usab ako makabati sa mga huna-huna ni vice-governor Julius Herrera, ug ako nakadayeg pag-ayo sa iyang mga lunsayng tinguha alang sa katawhang Bol-anon. Lahi si Julius nga pagkatawo: mobuhat lang ug maayo bisan ug walay pagpahibalo.

Pagka-mayor sa Tagbilaran? Sa akong pagpauli sa Bohol dili pa lang dugay, daghan kung nabati nga mga sugilanon mahitungod ni Atty. Dan Lim, apan wala dayon ko motuo kay lagi wa pa man usab ako maka-imbestigar kung unsa kini katinuod.

Para nako kung problema man si Dan Lim, siya gihapon ang angayan mahimong mayor sa Tagbilaran. Dan Lim gihapon ko.

Nakahibawo naman ta tanan sa panultion nga: “ang problema dili masulbad pinaagi sa laing problema.” Samot ka makaluluoy ang Tagbilaran kung mamayor (napud) si Joe. Nasayod naman ta nga sa sulod sa kapin siyam ka tuig nga siya ang nagdumala sa Tagbilaran – unsa may nahitabo sa Tagbilaran?

Pagka-bise mayor sa Tagbilaran. Dili pa lang dugay dihay mga e-mail gikan sa ginganlan ug Pito Honculada nga nagyagyag sa giingong pagkahilambigit ni Toto Veloso sa masiao ug mahjong. Ambot ug tinuod ba ni. Ang ako lang nga dili ko makabotar ug mga tawo nga may relasyon sa masiao ug mahjoyng. Samot ta ka uyayod ana.

Kung mopili ta ug konsehal sa Tagbilaran, ato lang seguroon nga dili ta mopili ug mga tawong hambogero nga magpatuotuo nga bright.

Daghan naman ko nailhan nga mga tawo nga makinaadmanon, apan wa man sila nagpagarpar nga sila bright. Ang tinuod bright magpakahilom lang kay nasayod sila nga ang Ginoo lang ang bright. Peligro ning mga kandidato nga hambogero. Pilia ang mga konsehal nga mapainubsanon ug dili k******n ug kwarta sa ubang tawo.

Sa laing bahin, nagpabilin nga si Gov. Erico Aumentado ang banggiitan nga politiko sa Bohol sanglit sa edad nga 27, siya napili naman nga board member sa atong probinsya.

Ingnon tang pulonga nga sa local Guinness record, si Gov. Aumentado ang nanguna – apan kung mapili si Jala nga bata nga wala nagpuyo sa Bohol ug walay kalibotan sa mga problema sa ikatulong distrito – mapapha na ang record ni Gov. Aumentado isip ang pinakabata nga politiko sa kasaysayan sa Bohol.

Mao, gobernador Aumentado, ikaw gihapon ang naghupot sa record karon. Ikaw nay mag-igo kung human sa imong kamatayon, ganahan ka ba handumon nga ang pinakabatang politiko sa Bohol nga napili ug board member sa edad nga 27. Anaa si Jala andam moilog sa imong record.

Kini mga sugyot lang ug huna-huna sa tawong dili makabotar kay nalayo man lagi ko.

Ikaw kinsa may imong botaran?
 
Want to react? register in this site. it's FREE

Linkback: https://tubagbohol.mikeligalig.com/index.php?topic=414.0