Author Topic: Certificate Of Bad Moral Character  (Read 1794 times)

pioneer

  • To God be the glory alone
  • FOUNDER
  • GURU
  • *****
  • Posts: 18911
  • stay at home
    • View Profile
    • spiritual preparation
Certificate Of Bad Moral Character
« on: November 09, 2009, 01:31:08 PM »
Certificate Of Bad Moral Character
By Michael Ligalig, published by the Bohol Standard

      Sa tinguha nga mapadayon nako ang akong pag-eskwela sa abogasiya, gilihok ko ang mga kinahanglanon alang sa akong pagtransfer sa laing tunghaan.

      Nakurat ko kay usa sa mga requirement mao ang “certificate of good moral character.” Naa pa diay ni nga requirement? pangutana ko sa akong kaugalingon. Kakataw-onon ko naghunahuna sa term nga “certificate of good moral character.”

      Sauna sa mga bata pa ta, murag lami ra man paminawon na nga term, dili ba? Bisan tuod tanan kaila ra sa lungsod, pangayuan man ang bata ug certificate of good moral character kung mobalhin ug laing eskwelahan o kaha magsugod sa elementarya o high school. Kay lagi bata pa ta, baliwala ra ni nato nga term ang certificate of good moral character.

      Pero karong kamao na ta mangutana ug magtuki sa mga butang, lahi na pud ang atong mga panglantaw. Sama aning “certificate of good moral character.”

      Aduna ba gyoy certificate nga magpamatuod nga tarong ka ug taras ug dili balasobas ang imong kinaiya? Kung adunay certificate of good moral character, angayan kaha pud nga adunay “certificate of bad moral character”? Nangutana Lang. Matod pa sa programa ni Loy Palapos.

      Unsa man kaha poy tamdanan o basihanan nga naay ‘good moral character’ ang tawo? Pananglitan, ang usa ka tawo maayo lang sa publiko ug dinayeg sa katawhan apan hudas ug kinaiya diha sa iyang panimalay ug walay nasayod nga taga-gawas mahitungod niini, angayan ba siya tagaan ug certificate of bad moral character? Ug kinsa man pud ang mo-issue ug ‘certificate of bad moral character?’ Ug nganong isyuhan man pud nga wala man pangoyoa?

      Pero sa ako nang gikaingon sa unahan, sanglit aduna may certificate of good moral character nga ihatag alang niadtong aghop ug mga kasingkasing aron sila makatrabaho o makaeskwela o madawat sa bisan unsa nga ilang gi-aplayan, dili ba makataronganon lang usab nga adunay mohatag ug certificate of bad moral character alang niadtong ‘maginoo pero medyo bastos’?

      Kini ra bang certificate of moral character kay way hinungdan. Ngano man? Kay lagi walay mohatag nimo ug certificate of bad moral character. Kung mangayo ka ug good moral certificate, tagaan gyud ka ug good moral certificate bisan unsa pa imong kinaiya o klase nga pagkatawo. Pila ra bay pag-type sa bondpaper: This is to certify that Mr. So and So is of good moral character… blah… blah… Human ang estorya.

      Unsa man poy tulubagon sa naghatag ug certificate of good moral character kon ugaling sa lintunganay ang nakadawat sa maong certificate nadiskobrehan nga adunay salawayong buhat kaniadto o kaha pagka-ugma nakabuhat ug salaod?

      Kung ato gyung tugkaron, makalibog man gud ni nga makakatawa ka. Unsa man lagiy basihanan nga pasidunggan ka ug certificate of good moral character? Kay dili ka mamalikas? Kay dili ka mosukol sa imong ginikanan? Kay dili managmal sa imong asawa? Kay dili ka kawaton ug manok sa imong silingan? Kay dili ka libakira? Kay dili ka tsismoso? Kay dili ka dawoan? Kay dili ka tigpakarong-ingnon? Kay dili ka bakakon? Kay dili ka tigpangopya sa exam? Kay dili ka manglili sa kasilyas? Kay dili ka usher sa swertres?

      Sa atong katilingban, anaay gipangpasidunggan sa atong gobyerno isip mao ni, mao na, kay lagi mao kono ni ilang mga nabuhat ug nakab-ot sa kinabuhi. Angayan man pasidunggan ang mga angayan pasidunggan. Angayan man ilhon ang mga adunay katakos ug abilidad aron mahimo silang kapanaminan sa uban.

      Ang nakaparat ani kay adunay mga nakadawat ug award sa atong komunidad nga adunay mga tinagoang sekreto nga naglambigit, pananglitan, sa pagpangawat sa salapi sa katawhan.

      Laing nakaparat ani kay daghang mga tawo o organisasyon nga daghang maayo nga nabuhat alang sa katilingban apan wala mahinumdumi. Kadto hinuong adunay mga hiwi ug binuhatan ang kanunay gipasidunggan. Mura ba ug si Barabas na hinuon ang gihatagan ug kagawasan.

      Maingon nga daghan ang nakadawat ug certificate of good moral character nga bija diay ug kinaiya, daghan pud ang mga ngil-ad ug taras nga wala tagai ug certificate of bad moral character.

      Kung gusto gyud sa usa ka eskwelahan nga makuha ang background sa usa ka tawo, NBI clearance ang pangayoon – dili certificate of good moral character.

      Walay takos nga mohatag ug certificate of good moral character ug walay takos nga modawat niini kay ang moral character sa tawo dili angayan butangan ug certificate. Pwede character reference, pero dili certificate of good moral character. Himoa nalang nang diploma aron makompleto.

      Sa gawas sa nasod, ang mga eskwelahan ug kompanya moadto lang sa google.com aron sutaon kung unsay imong pagkatawo.

      Sa akong bahin, wala koy nahimo, nagpapirma gyud ko ug certificate of good moral character. Busy man akong amigo, ako nalay nagtype: “This is to certify that Mr. Michael Ortega Ligalig is blah…blah…blah…”

Linkback: https://tubagbohol.mikeligalig.com/index.php?topic=23652.0
Romans 10:9
"That if you shall confess with your mouth the Lord Jesus, and shall believe in your heart that God has raised him from the dead, you shall be saved."
👇👇👇
Na-try mo na ba yung Tala app? Reliable sa unexpected expenses at laking tulong sa future! Use this code 9SO1TSL or visit www.tala.com to sign up!

unionbank online loan application low interest, credit card, easy and fast approval

Tags: