Thursday, June 26, 2008
Si Presidente George Bush sa America mipalanog sa iyang pahasubo sa trahedya nga nahitabo sa Pilipinas bunga sa bagyong Frank uban sa pahibawo nga nagpadala siya og barko, eroplano ug mga sundawo sa nasud aron motabang sa rescue operations.
Si Bush nga nahinabi ni Presidente Gloria Macapagal Arroyo didto sa iyang Oval Office sa White House nagkanayon nga ang USS Ronald Reagan uban sa mga US navy nga mga sundawo maoy iyang gipadala nganhi sa nasud.
Gibutyag ni Bush nga maoy ilang kalipay ang makasilbi ngadto sa mga nasud nga anaa sa panginahanglan ilabi na sa mga biktima ug sa mga minahal sa kinabuhi niini nga anaa sa pag-antos.
Matud pa sa Presidente sa Estados Unidos nga gawas sa mga kahimanan ug mga sundawo, nagpadala pa siya og hinabang nga salapi nga nagkantidad og $100,000.
Midugang siya nga ang ilang mga pag-ampo alang sa mga nabiktima maoy anaa sa ilang kasingkasing tungod kay kaantigo sila mosabot sa mga kasubo nga mihakop karon sa mga kaparyentihan ug mga kahigalaan sa tanang mga biktima sa maong katalagman.
Nasabtan usab ni Bush ang kasakit nga gibati sa mga pamilya sa mga nabiktima sa pagkalunod sa MV Princess of the Stars didto sa kadagatan sa San Fernando, Sibuyan island, lalawigan sa Romblon niadtong Sabado diin ang kahigwaos kun makita pa ba nilang buhi ang ilang mga minahal nga naangin sa disgrasya maoy anaa sa ilang galamhan.
Gipasalig ni Bush nga ang hinabang pagkaon iya usab nga ipadala nganhi sa nasud aron makatabang sa kagamhanan sa pagpahiuli sa kasubo niadtong mga nabiktima sa bagyong Frank.
Nasayran ni Bush nga gawas sa nangamatay sa kadagatan daghan pang nawad-an og mga panimalay gumikan sa kakusog sa hangin inubanan sa uwan ug baha bunga sa maong bagyo.
Linkback:
https://tubagbohol.mikeligalig.com/index.php?topic=13589.0
