SI SARANGANI Governor Miguel "Migs" Dominguez nagbutyag nga angayang dili palabyon kining mga negusiyante nga padayon ang pagpanago og mga bugas ug maoy hinungdan sa krisis nga nasinatian karong panahona.
Matud sa Gobernador nga bag-o pa lang niya gipangtawag ang pito ka mga Mayor sa iyang probinsiya aron pahimangnoan ug pangayoan og tabang sa pag-monitor sa mga magpapatigayon nga dunay mga bodega sa humay.
"Ako nang gipulong ang akong mga mayores sa pito ka mga munisipyo sa Sarangani nga motabang sa atong kampanya karon nga dili gyud tagoan ang mga bugas sa ilang mga bodega, ako nang mando sa ilaha nga ipahibalo sa akoa kung duna silay mahibal-an aron maimbestigahan nato ug kung angayang silotan ato kanang buhaton aron dili kini mapamarisan sa uban," matud ni Dominguez.
Gikahadlokan sa opisyal nga dili layong mahitabo sa nasud karong panahona ang nahitabo sa India nga rayot tungod sa padayong pagsaka sa mga nag-unang palaliton sama sa bugas, mga delata, ug ubang mga nag-unang gikinahanglan sa balay.
Samtang pabor usab si Dominguez sa pagtuon sa National Food Authority (NFA) nga patas-an ang presyo sa bugas sa NFA tungod sa padayong pagkalugi karong panahuna sa NFA. (Mel Coronel)
(Abril 15, 2008 isyu)
Linkback:
https://tubagbohol.mikeligalig.com/index.php?topic=11818.0
