Sakyanan sa LGU-Valencia na-disgrasya niadtong sabado sa gabii.
Segun sa blotter sa PNP - Valencia, usa ka Isuzu D-Max Boondock, 4x4 double cab, nga may plate number SHZ 915, nga naka-rehistro sa ngalan sa LGU-Valencia, ang nadisgrasya didto sa barangay Taug, sa may mga alas 10:30 ang takna sa gabii, niadtong Sabado, September 3, 2011. Ang bloter sa kapulisan nagpakita nga ang maong sakyanan sa gobyerno, nga nagdagan sa gabii sa adlaw nga Sabado, gimaniho sa usa ka Marlon Sumayo, nga taga Pob Oriental. Kaubban ni Sumayo sa maong sakyanan niadtong panahon sa pagkahitabo mao ang laing duha ka mga tawo: sila si Gibson Sumayo, nga igsoon sa driver, ug Jonathan Cuadra nga taga Garcia Hernandez, nga usa ka Nurse sa Leona O Lim Memorial Hospital, sa Canmanico, Valencia, Bohol. Ang blotter sa kapulisan nagtug-an nga ang maong sakyanan nagdagan sa national highway gikan sa Garcia Hernandez ug paingon sa lungsod sa Valencia. Pag-abot sa may barangay Taug, human ni-agi sa likuon nga dalan, kalit lang kining mi-skid ug nibangga sa usa ka punuan sa kahoy sa daplin sa national highway. Ang tulo nga sakay sa maong sakyanan gidali sa pagdala ngadto sa LOL Memorial Hospital.
Sumpay sa maong hitabo, segun sa kasaligang tinubdan, ang maong driver usa ka casual employee sa municipio sa Valencia. Niadtong gabii sa Sabado, ang maong driver, kuno, gisugo sa Halangdong Mayor sa Valencia sa paghatud ug sulat didto dapit sa Garcia-Hernandez. Tungod kay gabii na man, mga alas-9 na, iyang gipauban ang iyang manghud.Sa pagpauli na kuno nila, ilang nalabyan, ug gipa-hitch, si Jonathan Cuadra, nga niadtong mga orasa padulong na sad sa lungsod sa Valencia kay mo-duty isip Nurse sa LOL Hospital, nga gipanag-iya sa pamilya sa Mayor sa lungsod. Tungod kuno kay ang maong Nurse man grabe nga angol sa maong disgrasya, gidala kuno dayon sa Cebu.
Linkback:
https://tubagbohol.mikeligalig.com/index.php?topic=43361.0
