By Mike Ligalig
published by The Bohol Standard BANGKOK, THAILAND - Daghang mga butang nga dili mabuhat sa uban kon dili ang mga Filipino lamang ang makasarang.
Sama pananglit sa nahitabo kagabii diri sa Bangkok.
Niabot gikan sa Germany ang akong higala nga si Bebie Estrella Zagorski, ang tag-iya sa matahom nga La Estrella Beach Resort nga anaa sa Cabilao Island, Loon, Bohol. Kauban sa iyang paghidangat ang iyang igsuon nga si Ofelia nga gikan sa Australia nga karon Australian citizen na ug si Nina, usa ka dalaga nga German nga motrabaho sa iyang resort sulod sa unom ka bulan.
Adunay igsuon si Bebie nga nagtudlo ug English diri sa Thailand. Ug mao nagkatapok ang tulo ka mga igsuon. Kauban usab namo si Jojo Elcana kauban nako sa trabaho ug si Lalang, higala ni Jojo.
Didto mi nagtapok-tapok sa lobby sa Novotel Hotel. Ug didto may mga mag-aawit nga mga Filipina.
Diri sa Thailand ang mga hotel ug resort gidagsaan sa mga mag-aawit nga Filipino, ilabina didto sa Phuket diin atua didto naghugop ang liboan nga mga turista.
May nagsulti kanako kaniadto nga bisan didto sa Bahamas ug Caribbean, ang mga Filipino ang kasagarang maglilingaw sa mga hotel ug resort.
Ang kahibalo sa mga Filipino sa English dako kaayo ug gikatabang sa ilang pagpanimpalad sa lain laing nasud sa bisan unsang trabaho.
Makamao ang ubang mga nasud sa pinulungang English apan daghang mga butang nga dili nila mabuhat.
Sama pananglit didto sa Novotel Hotel. Miawit ang Filipino band ug nagkalain-laing pinulungan. Nalipay ang mga Thai sa dihang ilang giawit ang usa ka sikat nga kantang Thai diri. Unya miawit usab sila ug “Anak†sa Asin.
Nalingaw pag-ayo ang daghang mga turista sa kaanindot mo-awit sa mga Filipino ilabina sa dihang misayaw si Ofelia ug si Nina. Misamot kabibo sa dihang ilang giawit ang Aserehe ug misayaw si Bebie ug Ofelia. Ug nanayaw ang mga mag-aawit Ug namakpak ang mga turista.
Usahay makaingon ta nga isip Filipino nagkahulugan ug kalipay ug kasadya.
Akong gisultihan si Jojo: “Seguro ang hinungdan ngano kasagaran sa mga Filipino maayo sa musika mao nga ato nalang ginakanta-kanta ang atong mga problema.â€
Nagkanayon si Jojo: “Tinuod gyud na. Bisan ang akong papa, kung naa syay problema, mao na ang panahon nga mokanta sya. Ug maingon man usab ako.â€
Nakapamalandong ko nga bisan sa kadagtum sa mga suliran nga mihapak sa atong nasud, apan daghan kanato makamao gihapon sa pagpahiyom ug pag-awit. Lahi sa ubang mga nasud nga kon adunay problema, maghikog dayon sama pananglit sa ubang mga tawo sa Japan.
Ug tungod niini, nakatrabaho ug niuswag ang mga kinabuhi sa mga Filipino sa gawas sa nasud tungod lang sa pag-awit.
Diri sa Thailand gipapuyo sa hotel ang ubang mga mag-aawit ug kasagaran kanila taas ug makita sa usa kabulan nga dili gyud nila madawat kung atua sila sa Pilipinas.
Maingon man ang mga magtutudlo nga Filipino diri sa Thailand. Usa lamang ang hinungdan ngano nga daghang mga Filipino ang nanimpalad na diri sa Thailand tungod kay nag-ilaid sila sa kalisud sa atong nasud apan naarangan ang ilang kahimtang diri.
Kung atong hunahunao, layo ra kaayo ang Thailand sa Pilipinas niadtong 1960s ug 10970s. Apan karon naghangad na kita ning maong nasud. Naapsan na gani ta sa Vietnam. Ug atua na usab nadagsa ang daghang magtutudlo nga Filipino sa Vietnam.
Nabuhat sa mga Filipino ang dili mabuhat sa ubang mga nasud kay ato usab natagamtam ang mga problema nga wala masinati sa ubang mga nasud.
Linkback:
https://tubagbohol.mikeligalig.com/index.php?topic=874.0
