Inside Bohol > Tagbilaran City - Bohol

Grenade Found in Old City Hall

(1/1)

MikeLigalig.com:
Granada nakit-an sa City Hall-
daan, malampuson’g nahipos

TAGBILARAN CITY, September 27, 2018 (PIA)—Malampuson nga nahipos sa mga tinugyanan sa Philippine Coast Guard (PCG) ug sa kapolisan sa Tagbilaran ang usa  ka buhi apan karaan nga granada nga hingkaplagan didto sa daan nga City Hall, Septembre 27.

Segun sa inisyal nga taho nga gipaambit sa PCG pinaagi ni Ralph Barajan, nangayo og pakitabang ang mga tinugyanan sa City Police ngadto sa PCG aron makapadala sa ilang K9 unit ngadto sa daan nga City Hall aron kahimo-an og verification ang nakaplagan nga karaan nga granada.

Matud pa sa City Police nga usa  ka sakop sa ALERT sa Tagbilaran ang nakakita sa usa ka buhi nga granada sa mga alas 8:20 sa buntag didto sa karaan nga Tagbilaran City Police Station, sa karaan nga City Hall. 

Dali nga gisubay sa K9-Bohol uban sa PCG ang hangyo-pakitabang aron masuta ang kamatuoran sa taho.

Sa mga alas 9:30 sa buntag, positibo nga gitumbok sa mga eksperto sa explosives and ordnance sa Coast Guard ug K9 unit nga ang nakaplagan, usa gayud ka buhi apan vintage nga Granada ug may dako nga risgo nga mobuto.

Gihimo dayon sa Coast Guard weapons disposal team ang pagseguro nga dili makabuto ang granada pinaagi sa pagputos niini sa usa ka panel aron mahipos kini nga wala nay risgo nga aksidente nga makabuto.

Ang karaan nga granada, naa na karon sa mga kamot sa kapolisan sa Kampo Dagohoy alang sa tukmang pagtipig ug pagpahimo niini nga dili na risgo sa katawhan, segun pa sa taho sa Coast Guard Tagbilaran. (rahc/PIA-7/Bohol)

Save the link https://tubagbohol.mikeligalig.com



Linkback: https://tubagbohol.mikeligalig.com/index.php?topic=89770.0

Navigation

[0] Message Index