Hearing sa P1.055B budget sa syudad
sa 2020 miarangkada na sab ning adlawa
IKADUHANG arangkada karong adlawa sa pagdungog sa Sangguniang Panlungsod (SP) sa gisugyot nga P1.055 bilyones nga budget sa kagamhanan sa syudad sa Tagbilaran para sa sunod tuig.
Ang budget hearing gihimo sa SP Committee on Appropriations and Accounts pinangunahan sa tsirman nga si Konsehal Tim Butalid sa JJ’s Seafood Village ning dakbayan sugod sa 9:00 ning buntaga
Unang gituki ang mga budget sa SP, apil ang Office of the City Vice Mayor ug SP Secretariat, ingon man Business Permit and Licensing Division ug Office of the City Administrator nga pulos ubos sa buhatan sa mayor.
Isunod ang budget sa economic sector nga maglambigit sa City Agriculture Office, City Veterinary Office ug City Engineering Office.
Sa 1:00 sa hapon, utingkayon ang budget sa social services sector kalabot sa City Health Office ug Office of the City Social Welfare and Development.
Isunod ang budget sa economic enterprise mahitungod sa Tagbilaran City Waterworks Service, Integrated Bus Terminal, ug mga merkado ug fishport.
Basi sa giduso ni Mayor John Geesnell Yap II ngadto sa SP pinangulohan ni Bise Mayor Jose Antonio Veloso, ang proposed annual budget sa syudad para sa 2020 mokabat og P1,055,004,900.
Apil na sa kwentada ang surplus o subrang pondo sa kagamhanan sa syudad ning tuiga nga gibanabanang moabot og P40 milyones.
Ang budget message sa mayor nagbutyag ning mosunod nga mga dagkong gastohanan sa sunod tuig: General public services, P528.41 milyones; economic services, P245.68 milyones; social services/welfare, P122.17 milyones; health/nutrition/population programs, P107.68 milyones; ug calamity reserve fund, P50.75 milyones.
Basi gihapon sa suwat sa mayor ngadto sa konseho, ang mga proyektong prayoridad sa 2020 maglakip niini---pagkonkreto sa mga karsada uban ang drainage; pagtaud og dugang street lighting facility; pagtukod sa legislative building; pagtaud og traffic command equipment; pagtaud og dugang nga mga CCTV camera; ug pagpalit og ambulansiya.
Gisugdan sa gamhanang komiteba sa aproprasyon ni Konsehal Butalid ang budget hearing niadtong Lunes nga nagtuki sa mga budget sa Treasurer’s Office, Accounting Office, Budget Office, Assessor’s Office ug General Services Office.
Gituki usab ang mga budget sa Human Resource Management Office, City Planning Office, Civil Registrar’s Office ug City Legal Office. (Ven rebo Arigo)
Book online travel tickets in Asia, Australia and New Zealand at:
https://12go.asia/?z=3467325Linkback:
https://tubagbohol.mikeligalig.com/index.php?topic=91424.0