MikeLigalig.com

usa


gitutokan tika sa usa ka mata
gipaminaw sa usa ka dunggan
gigukod, giapas sa usa ka tiil
gigakos sa usa ko ka bukton

ug ako ang imong usa ka pako
ako ang imong usa ka katig
ako ang imong usa ka haligi
ako ako -- imong usa ka usa

Unang gabii, tupad ni Penelope


Mipingis sa bintana ang suwang sa buwan,
Ug natun-ogan ang hubon sa akong dughan.
Gisud-ong tikang gihukasan sa alimungaw â€"
Ug padayon kong gihutoy sa tumang kahidlaw.

ok. ganahan mog tigmo, tagaan ta mog balak nga tigmo.

duha ni ka tigmo nga usa ray tubag.



ilong sa pantalon:
kugmong pitaka
diha kuoton.

*

kibot sa polong puti:
ballpen nga gatuwad
nagkatae-tae.

ang balay sa tikasan


kung mangutana ka kung asa ang balay sa tikasan,
tultolan tika: liko sa tuo kablit sa wala dulhog sa unahan
lahos sa iskinita dire-diretsoa ang ngilit nga simanganan
sa ikatulong sagkaon baktas sa ikatulong kasagingan
lipot sa banakod diselya duol sa lapad nga tugkaran
ug moabot ka karon diha mismo sa imong gibarugan.

ug kung mangutana ka kung kaila ba ko sa tikasan,
subayan tika: anak ko sa igsuong lalaki sa uyuan
nga pag-umangkon sa kaluhang igsuon sa apohan
nga may binalaye nga ig-agaw sa akong pikas iyaan
nga bilas sa bayaw nga nakaburos sa akong inahan
nga may bugtong nga anak nga usa ka tikasan.

Quote from: Koddi Prudente on June 22, 2009, 01:47:18 AM
Abi nako og tigmo ni. Pagkalisora sab nianang klaseha sa litson, nga itlog ra man diay ang gusto sa prinsesa. Unsa kaha no?, kon mangala ang mga asawa og inngon niana nga klase sa litson?

speaking of pangala, mag-unsa pananglit kung mo-request ang asawa og mangga, pero (here's the catch) kinahanglan adto kini tughiton sa punuan sa kaymito. haskang budlaya. haha.

Quote from: fdaray on June 22, 2009, 12:34:30 PM
Kining 'bugtong 'naay special meaning sa mga Bol-anon. Ang bugtong lubi maoy lanahon sa mga tambalan ug  isambog sa mga hapas.

Kon bugtong kang anak, VIP ang treatment nimo sa pamilya. 

Sa Bible, jesus Christ is 'bugtong anak', a special child, our God and Savior.

nindot kaayo ang imong reading, nyor.

holistic kaayo -- anthropological, biological, ug spiritual.

matsalam!

Bugtong


Kung magpatawag ang hari og kumbira,
Magpatumba siyag elepante aron litsunon.

Ug sa tiyan niini idasok ang kinahumotan
Nga lamas, inubanan sa tinibuok nga baka.

Ug sa tiyan sa baka, ilimin ang dugang lamas
Nga gipatabanan og tinibuok nga baboy.

Sa tiyan sa baboy, ang tinibuok nga kanding.
Ug sa tiyan sa kanding, ang usa ka manok.

Ug sa tiyan sa manok, ang usa ka buntog.
Ug sa tiyan sa buntog, ang usa ka itlog --

Nga igahin pirme sa mapinanggaong hari
Alang sa iyang bugtong nga prinsesa.

pangadye


balaan nga makagagahom,
tagai kog lingin nga panabot.
tudloi kong mangayo sa wala.
hagki ang akong kalag
aron kini maglipang â€"
aron kakat-on ko og tahod
sa tanang mga butang
nga wala ko panggaa.
himoa kong tinuod nga tinun-an
sa mga lihok sa mananap,
sa panahon, ug sa palibot.
gasahi intawn ko panagsa
og sakit sa paglimot.
ug pasayloang gakalampati ko
og sabot sa kamatuoran
ug sa gibutyag sa gigamyon
sa lusok sa monggos
dinhi sa akong palad â€"
ug ako, niining kalibutan.

-- adonis durado

sama sa li po poem ni sir jun dumdum, ang original ani nga english nindot pud kaayo. unsay tan-aw ninyo kung ang pulong nga "maagaw" ilisan og "makawhat"?

Sama sa pagbali sa sanga
Aron makawhat ang bunga...

nakahinumdom ko sa giingon ni leoncio deriada: nothing in the poem should be there, unless it contributes to the poem. mao niy kalidad ining balaka -- mubo ug way buwak-buwak.

NGANO MAN DIAYG VIOLET ANG BARIKUS SA BAGTAK NI VIOLETA?


Ma-discourage ba diay ko niana?
Mominus ba diay ang akong kadisidido
sa pagkat-on og violin ginamit
ang imong bukton ug akong dila?
Mokagar na lang ba diay og kalit
ang gana nako sa paghalok kanimo
og pinakatay â€" gikan sa imong tingkoy
hangtod sa tumoy sa imong kuyamoy?
Isnabon na lang ba diay nako
ang mga balbon sa imong tangkugo
nga buot ko untang lumluman
sa akong mga ngabil ug tudlo?
Haaaay, my dear purple Violeta,
di ka angay makonsimisyon niana.
Kay dili ko ingon ana kamabaw
motimbang-timbang og pagbati.
Kung moingon sila nga love is blind,
ang akong gugma nimo is colorblind.
Ug way bisan kinsa ang makaugkat
sa hingpit kong pagbati kundi
buk-on usa ang gusok nga miputos
ning gahubag kong kasingkasing.
It won’t be easy, tungod blade ra
mismo ang itugot nakong huramenta.
Sa imo bang pagtuo, Violeta,
ingon ana lang ba kasayon papason
ang tulo ka semana, upat ka oras,
ug trese segundo natong paghigugmaay?
Hunahuna nga ang imong nawong
baya ang kanunayng mo-register
sa samin kung moatubang ko niini.
Way tiaw. Mor pa. Mamatay pa
ang tanan nakong binatnang anay.
Sa pagkatinuod, kung mauwaw ka
nga violet ang imong barikus,
mas ako ang angay mauwaw nimo.
Violeta, kung kahibaw ka pa lang...
violet ra ba ning akong ulok.

mike: salamat kaayo.

ginger: daghanan nato og cheese bahalag lactose intolerant.

scott: palihog og post sa original english kay naa man ni sa iyang "third world opera".

kung unsa ka ngilngig sa bisaya nga translation, ingon pud ana ka ngilngig ang original niini nga iningles.

i hope ma-post sad nimo ang english translation ini, mike.

Nganong ang pizza di angay
sa mga tawng lonely?


Sa Pizza Hut kaganiha,
suya kaayo ko sa manag-uyab
nga galingkod sa akong atbang.
Loving kaayo ang mga inatay.
Sa ka sweet, diabetison ka.
Sa ilang gipang-istoryahan,
lingaw kaayo ang mga amaw.
Nga kung duna ganiy ihunghong
ang lalaki sa dunggan sa babaye
moagik-ik kini, manghampak.
Hampak nga maguwang ras halok.
Unya kita? Ambot, kalimot na ko
sa katapusan nga pasiaw
nga gihagawhaw nako nimo.
Kutob man lang gud tawn ta ini
sa pangumusta sa telepono.
Mag-unsa man nang “Take care”
kung way pakapin nga tutok?
Mag-unsa man nang text nga “luv u”
kung way palaman nga halok?
Ug di pareha sa duha, magtagbo
na gani ang ilang mga mata,
sus, ang ilang mga pakihat-kihat
nipalanay og samot sa mozarella.
Hahay, sige lang, ugma puhon,
bisag gibaharan kong kulatahon
kung hikit-an sa imong igsuon,
bagton gyud tika sa inyong iskina.
Buwahan magkatinutukay tang duha.
Ug buyagon tikang aduna kay muta.
Nga kabang pagkakiskis sa imong kilay.
Nga morag kaluha ra sa bun-og
ang imported mong eye-shadow.
Aron saputon, mosurok imong dugo.
Aron mangluod dayon ka nako.
Ug mangayo dayon ko nimog pasaylo.
Aron kung mapasaylo na ko nimo,
ahem, paraygan dayon tika --
imbitaron nga mangaon og pizza.

bulak:

si mike kahibalo mismo nga ang criticism is part of literature. ug kahibaw siya nga ang criticism dili usa ka pagsaway, kundili usa ka paagi sa pagpalig-on sa imong gipanday. part sa existential wound sa usa ka magsusulat nga dili makamatikod kung unsay iyang mga sayop kay while writing naa siya state of catarsis. writing is more of outpouring, and it takes re-writing and lots of polishing to turn that stone into gem.

gani, para nako, ang positive part sa literary workshop kay paghatag sa tanang panelists sa ilang reading o criticism sa imong trabaho. wala ni nagpasabot nga imong sundon kung unsay ilang imando o itudlo nga sayop, apan naa ra nimo ang paghashas ug pagtimbang kung asa sa mga pagsaway ang nagdala sa matuod ug motabang nga mapagilak ang imong balak.

also, tingali mouyon si mike nako nga dili lang ta kinahanglan mosulat og balak. kinahanglan pud ta mo-aspire nga ang atong balak maka-contribute sa history of world literature. kung balak lang nga balak ang hisgutanan, kadaghang balakero sa kalibutan pero kutob lang sila diha -- suwat-suwat lang og balak. ang problema pa gyud sa bisaya, kanyahay di mouswag ang literature nato, kay mahadlok tag criticism. naa ganiy isulti, personalon dayon.

and we should also differentiate what is real poetry and what is just a mere outpourings. dali ra kaayong mosuwat og linyang balaknon, pero lisod mosuwat og tinuod nga balak.

parehas tag panglantaw sa balak, mike. dili pud ko ganahan og balak nga limpyo kaayo. kausa mireklamo si t.s. eliot sa iyang nabasahan nga balak ug nagkanayon: "it's too clean." buot pasabot, limpyo ug pasado kini, pero kuwang og rawness.

maski ako, dali ra ko kaila og sinuwatan sa usa ka magsusulat nga gagikan og literary workshop. ug may kalambigitan kini sa giriklamo pa ni eliot.

sakto nang mopadagayday ta diha sa atong panuwat, pero dili ra ni enough (gani bisag si rainer maria rilke miingon nga dili lang paigo ang lunlon nga kasinatian). ug kahibaw tang mas demanding pa ang literatura, gani bisag ang mga henyo sa panulat moingon nga dili lalim ang mosuwat. maghisgot man tag karaan nga style o bag-o, kining tanang magtamod og lagda. mahimo mong buk-on ang usa ka balaod, pero aron ilasan kini sa kaugalingon mong balaod o panlantaw. (usa ka dialectic ang history sa literature.) ug hisgutanan sa consistency, si e.e. cummings consistent sa iyang paggamit og lower case, gani masuko siya kung ang iyang pangalan gamitan nimog capital. ug bantayi ang line cut sa kasagarang mga balak ni ginsberg, haskang ternuha. ug kung wala pa sa ilang strong academic background o understanding sa literatura, dili sad makabuhat og ingon ana ka ngilngig nga modernong balak silang cummings ug ginsberg. (si cummings diay naay MA sa classical literature sa harvard university; si ginsberg scholar sa columbia university studying pre-law.)

ang punto nako diri mao: we should learn the basic rules before we break them.

hala, basig ako si myke obenieta?

ganahan kaayo ko ining balak, labi na sa iyang uluhan.

1. hisgutanan sa porma, medyo wala ko kasabot sa gasunod nga gamit sa parenthesis into two separate stanzas. makita man gud nako nga mahimo ra ning usahon -- sa kinatibuk-an, ang balak naay tulo ka stanza with 4 lines each.

2. kinahanglad sad og consistency -- kung magsugod og capital ang kada line, kinahanglan capital until the end. ug sama ra sad nga kinahanglan ka mogamit og punctuation consistently.

3. i think ma-achieve gihapon ang force sa linya without using exclamation point at the end. pero basig ako ra ni, kay allergic man kog punctuation mark. pero as a general rule gyud, only use it when it's necessary.

4. honestly, medyo weak ug trite ang last line. emphatic ra kaayo -- kuwang og nuances. as a writer, kahibaw man gyud ta nga demanding ang last line. kinahanglan gadalag tingga ang gilabyog nga pasol.

basa-basa lang ta, unya comment-comment pud og panagsa.

Quote from: Happy on May 27, 2008, 05:48:08 PM
Hahaha maayo diay nang pilpilon nang kamota da

ang uban ang kamot mapilpilan; ako pirmi ang baba. 

lihiro ra ko mosulat; pero di kabalong mohubad.

mora bag maayong lang manghubo; di diay kahibawng mouli. 

daku kaayo ang potential ani nga balak. kinahanglan lang ni og gamayng hilot -- nindot ang sinugdanan pero medyo na-vague pag-abot sa linya nga "gipidpid mo ako sa imong mga halok". unsa may buot pasabot ani? tingali naa sa pulong nga "napidpid" ang problema o kaha tingali kinahanglan gyud i-write ang linya nga mokonekta sa contention sa sinugdanan.

i-post unya diri imong translation.

salamat sa pag-abiba!

tinabanog
(itaban tikas panganod)


itugpo ang kibol mong kasingkasing
kay sakdapan kos akong pagpangga.
ang ngabil mong gadala og hagong
lamburan kos haguros sa kahingawa.
kung mabugto man ang tugot sa atong saad,
gukdon ko ikaw bisan asa sa hangin ipadpad.

Unsaon pagpangga sa babayeng claustrophobic

Kung gakson nimo siya og hugot,
Kinahanglan abri ang mga bintana
Sa imong kasingkasing ug hunahuna
Ugaling mokalit siyag lugnot.
Lugwayi ang higot sa imong pasensya
Kung moriklamo nga di siya ka ginhawa.
Kung imo gung atbangan og lagnot
Ang pagsuki sa nikubit nga isda
Hibugtuan nuon kag pasol, di ba?
Maong panggaa siya ingon ka hugot
Sa pagtuno sa kwerdas sa sista,
Ingon ka sigkit sa ang-ang sa hagdan,
Ingon ka huot sa lusong sa alwa.

Ang babayng way bilbil

Ang babayng way bilbil kay morag baybay nga way kimba.
Morag sigay nga way bukobuko, tabugok nga way ata.
Sa bilbil mahibaw-an nganong bawron ang kadagatan,
Nganong gansang-gansangon ang mga batu sa hunasan.

Ang babayng way bilbil kay morag kawayang way buku.
Morag dapaw nga way katul, langub nga way tangu.
May misteryo ang bilbil nga susama sa misteryo sa lasang:
Engkanto sa pusod sa busay, minu sa pus-on sa pangpang.

Ang babayng way bilbil kay morag dan nga way kurbada,
Morag bungtod nga way subida, simbahan nga way kampana.
Ang babayng bilbilon morag sugilanong puno sa pasumbingay:
Sa gaawas-awas nga bilbil, may kaunlanan akong pauraray.