TIGBALITA NAGHIKOG; GI-FB LIVE NGADTO’S UYAB?
CENTRAL MINDANAO - Patay nang makaplagan sa pamilya ang usa ka tigbalita Kidapawan City alas 5:00 sa buntag kaganina, Sabado, human giingong nagpakamatay.
Ang biktima naila sa radyo isip DJ "Don Romantiko".
Sumala sa inahan niini nga nadunggan pa nila mga alas 2:00 sa sayong kaadlawon naglalis ang biktima ngadto sa iyang uyab nga taga Kidapawan City apan tua nagtrabaho sa gawas sa nasud.
Misiyagit pa kini nga di siya buwagan sa babaye kay magpakamatay siya. Wala na lang kini gitagad sa inahan tungod matud pa, panahon nga mahubog ang biktima sabaan kini ug kalit nga mihilum.
Sa kaadlawon na, nadiskubre na lang sa pamilya nga naghikog ang biktima sulod sa iyang kuwarto gamit ang pisi nga gihigot sa liog ug abli pa ang selpon niini nga naka-FB live sa iyang uyab.
Giingong si Tarranza usa ka multi-talented media man, puwede matud pa nga DJ, puwede sab nga anchorman ug labaw sa tanan maayo siya sa technical nga gimbuhaton sa broadcast.
Duna matud pa kini tulo ka mga anak sa iyang kanhi asawa nga namatay tungod sa gihambin nga balatian.
Kahinumdoman nga misulay na sab ang biktima sa pagpakamatay sa sulod sa istasyon sa radyo sa Midsayap, Cotabato Province apan napugngan sa mga kaubanan ug wala madayon.
Daghan ang nagsulti nga malipayong tawo ang biktima tungod kay palasiaw ug kanunay nga mokatawa samtang makig-istorya sa mga higala apan nagsubo diay ang iyang kasingkasing.
Nagsubo ang mga tigbalita sa Central Mindanao sa gidangatan ni Don Romantiko.
Kung duna kamo'y mga gihambin sa galamhan ug nanginahanglan kamo og tawo nga maistoryahan sa inyong gidala nga kasubo, ug uban pang mga mental health crisis, puwede kamo nga motawag sa National Center for Mental Health, 0917-899-8727 (USAP), 7989-8727 (USAP) naa sab ang Hopeline, 0917-558-4673; 0918-873-4673; 8804-4673 2919 (toll-free for Globe and TM).
via | Edgar E. Fuerzas, Correspondent
Photo | Gipaambit nga hulagway
news.mikeligalig.comLinkback:
https://tubagbohol.mikeligalig.com/index.php?topic=122771.0
