Ni Chester Abadilla WC (Banat) Updated May 14, 2012 12:00 AM
CEBU, Philippines - Mas haruhay karon ang pagpauyo ug panginabuhi sa himabaw sa usa ka gatos ka mga rebel returnees sa lalawigan sa Sugbo ang misagop sa amnesty program sa gobiyerno ug mihangop sa hinabang financial gikan sa kagamhanan sa lalawigan.
Mao kini gibutyag ni Governor Gwendolyn Garcia kinsa miila sa tulo ka mga rebelde nga mibalik na sa sabakan sa balaod nga mao sila si Dioscoro Pasaje Jr., alyas Jun Alsamasa; Rodulfo Quimbo alyas ka Rudy; ug Sergio Lauron alyas ka Serhing kansang mga panginabuhi luag ug malinawon na kun itandi niadtong panahon nga sakop pa sila sa walhong pundok.
Gisusi sa Sugbo News team ug Banat News ug nasuta nga si Pasaje miabin sa NPA kaniadto kay gusto siyang manimawos sa mga PC ug Kadre kinsa mikulata kaniya kaniadto.Apan dihang milanat na og pipila ka tuig niyang pagtago-tago sa kabukiran uban sa mga NPA nakahukom siya sa pagbalik sa sabakan sa balaod kay nakita niyang wala diay siya’y klarong kaugmaon sa maong pundok.
Samtang si Quimbo kinsa maoy silbing recruiter sa NPA mitug-an nga nadani siya sa gipasalig sa mga NPA nga hatagan siya og kaugalingong yuta, apan hapit na mapudpod ang iyang lapalapa og binaktasay sa bukid wa gayud matuman ang maong saad hinungdan nga nakahukom siya sa pagbiya sa maong pundok. Si Lauron miangkon nga ang kakuwang niya sa edukasyon maoy nagtukmod kaniya sa pagtuo dayon sa gipatuo kaniya sa mga NPA apan dihang namatikdan niyang way kapuslanan ang ilang misyon kay sama sila sa wakwak nga manggawas og magabii, nakahukom siya sa pagbiya gikan sa maong pundok.
Sila si Pasaje, Quimbo ug Lauron miingon nga kaniadtong miyembro pa sila sa NPA kanunay silang nabalaka sa ilang kinabuhi kay magpuli-puli lang og duaw sa ilang mga balay ang mga kauban nilang rebelde ug mga sundawo.
Apan sukad niadtong mibalik sila sa sabakan sa balaod pinaagi sa pagsanong sa awhag ni Gobernador Garcia ug sa mga kasundalohan, karon pa sila mobati sa kaharuhay sa ilang pagpuyo. BANAT NEWS
Linkback:
https://tubagbohol.mikeligalig.com/index.php?topic=50529.0
