Ni Sanden Anadia/WC (Banat) Updated July 25, 2011 12:00 AM Comments (0)
CEBU, Philippines - Sa tinguha nga kahiusahan sa mga Pilipino ang kamalinawon sa Pilipinas, pasiugdahan sa kapariang Katoliko ug sa military ang usa ka proyekto nga dagan sa gilay-ong 2888 kilometros subay sa gitawag nga Philippine Maharlika Highway gikan sa dakbayan sa Laoag paingon sa dakbayan sa Zamboanga sa gidugayong walo ka buwan.
Si Fr. Melo Diola sa San Carlos Seminary of Cebu mibutyag kagahapon sa usa ka press conference didto sa Seminario Mayor sa Mabolo nga sugdan nila ang Takbo Maharlika Tungo sa Pagkakaisa karong Agusto 8, uban niya ang usa ka retiradong opisyal sa polis nga si Chief Supt. Samson R. Tucay.
Silang duha modagan og tag 20 km matag adlaw nga bahinon sa tag 10 km sa buntag ug 10 km usab sa hapon.
Matud pa ni Fr. Diola nga wala sila mabalaka sa ilang pagdagan tungod kay may kauban usab silang mga modagan sa matag lungsod sa 31 ka lalawigan nga ilang daganon.
Iyang gitug-an nga ang kapolisan usa sa mohatag kanila og seguridad sa matag lugar nga ilang daganan, matag adlaw, samtang ang taga Department of Education moagda usab sa ilang mga estudyante sa pagkuyog og dagan sa mga lugar nga ilang mahimutangan.
Midugang si Fr. Diola nga ang kapolisan dinhi sa Sugbo mosalmot usab sa maong dagan inig-abot nila sa Zamboanga nga maoy utlanan sa walo ka buwang dagan. Usa sa mga kaayohang ikatampo sa maong dagan mao ang una sa tanan kaayohan sa panglawas ug ang pagpalanog sa adbokasiya nga pinaagi sa pagdagan, nga usa sa mga matang sa ehersisyo sa lawas, mahapsay ang utok sa tawo ug kalikayan na ang mga dautang bisyo niini nga maoy makahatag og yabag nga kinaiya ug hunahuna sa tawo.
Matud pa ni Fr. Diola nga kun himoong sumbanan sa katawhan ang ilang buhaton mag-aghat kini sa tanan nga angayang hiusahan ang kalinaw nga gipangita sa mga Pilipino karong panahona. - BANAT NEWS
Linkback:
https://tubagbohol.mikeligalig.com/index.php?topic=42478.0
