Ang kandidato sa Lakas-Kampi-CMD sa pagkagobernador nga si Kong. Edgar M. Chatto maoy labing gikinahanglan, angay ug tukma nga mosunod nga lider sa mga Bol-anon, sumala sa hugpong ug krusada nga Padayon Bol-anon.
Ang grupo nagkanayon nga huyang ang usa ka lider nga nagsalig sa iyang kahanas sa pagpamakak.
Kini ilabina kon ang pagtumotumo gihimo batok niadtong adunay katakus sa liderato ug kang kansang mga mapuslanon nga binuhatan tin-aw ug tataw sa publiko.
Matud sa tigpamaba ug campaign manager sa Lakas nga si Bokal Alfonso Damalerio II, dili mahimo nga gub-on ug ibaliwa ang masilakon nga record ug hinlo nga reputasyon sud sa taas nga panahon sa pangpublikong pangalagad.
Kini gipadayag sa grupo agig reaksyon ngadto sa hugaw ug pangilad nga propaganda sa pikas kampo nga giulohan og “The Leader That Boholanos Need o Ang Lider Nga Gikinahanglan sa mga Bol-anon.â€
Ang maong propaganda nga binayrang gipatik sa pamantalaan naghulagway kang Bise Gob. Herrera nga angayng maglider sa mga Bol-anon bisag kini hingpit nga sukwahi sa iyang kapasidad ug karakter.
Ang propaganda bangis nga nibun-og sa ngalan ug dungog ni Chatto, lider nga Bol-anon nga gipasidunggan pa gani sa simbahan.
Matud sa Padayon Bol-anon, saksi ang mga Bol-anon sa pagtubo ug pag-ugmad ni Chatto isip lider sukad sa iyang pagka-estudyante ngadto sa iyang pagpakabana sa kabatan-onan isip presidente sa Kabataang Barangay sa Bohol kaniadto. Sa samang panahon, siya nagrepresentar sa kabatan-onan ngadto sa Hunta Probinsiyal o Sangguniang Panlalawigan.
Sa edad nga 27, si Chatto nahimong presidente sa tanang mayor sa Bohol, hangtud nga napiling bise gobernador nga naghimo kaniya nga labing unang Bol-anon nga nasudnong presidente sa tanang bise gobernador sa Pilipinas. Napili sab siya nga nasudnong presidente sa National Movement of Young Legislators (NMYL) nga dunay kapin sa 4,000 ka sakop nga mga batan-ong magbabalaod sa tibuok nasud.
Si Chatto maoy unang kalihim=heneral sa Union of Local Authorities of the Philippines (ULAP). Siya gani ang nagmugna sa ngalan sa maong organisasyon nga gilangkub sa tanang liga sa lokal nga kagamhanan sa nasud.
Ang katakus ni Chatto namatud-an sab sa Kongreso pinaagi sa mga balaod nga iyang gipanday. Ang iyang mga lehislasyon naglambigit sa nasyonal ug lokal nga kaugmaran. Siya maoy principal author sa Kongreso sa National Tourism Act of 2009, Bohol Island State University (BISU) Law, Expanded Special program for the Employment of Students (SPES) Law, ug uban pa.
Ang mga ulahing manipesto batok kang Chatto ug kaubanan gidahum nang daan nga bayran sa pikas nga kampo aron pud ipublikar sa rehiyonal ug nasyonal nga pamantalaan ginamit ang kuwarta sa goberno sama sa nahauna nilang gibuhat.
Kini gilantaw ni Damalerio nga laing desperadong lihuk aron lang tay-ogon ang ligon nga suporta sa katawhan kang Chatto ug kaubanan. Ang mga pagdaut gihimo uban ang grabe nga malisya.
Kini dugang nga pagsuway sa paghilo sa hunahuna sa katawhan ug pagsamad sa kredibilidad ni Chatto, kinsa kanunayng nag-una sa mga survey sa pagkagobernador sa Bohol, sumala sa Padayon Bol-anon.
Hinuon nagpasalamat ang Padayon Bol-anon sa mga binayran ug lipat-lipat nga manipesto kay kini samot nga naghukas sa maskara sa mga nagtakuban nga Lakas apan dugay rang nagbudhi sa partido.
Ang mga tigpakaaron-ingnon ug traydor namatud-an na gani karon nga nakigkunsabo sa ubang grupo. Nagkasagol ang ilang kaugalingon nga mga interes.
Apil sa mga dili kapartido nga nakigkunsabo karon sa mga nagbudhi sa Lakas mao sila si Mayor Dan Lim sa Tagbilaran ug iyang ginama nga si Mayor Leoncio Evasco sa Maribojoc.
Kini gumikan lang kay ang karibal ni Lim sa pagkamayor sa syudad mao si Bise Mayor Toto Veloso, presidente sa tanang bise mayor sa Bohol ug bayaw ni Chatto.
Dakung bakak ug sayop ang intriga nga si Chatto talawan morisgo sa panahon sa krisis. Sa labing tinuod, gihimo karon ni Chatto ang labing dakung risgo sa iyang pamulitika ug kinabuhi. Iyang gitanyag ang kaugalingon ug milansar sa pagkagobernador bisan og siya nasayud sa ngilngeg nga panagkunsabo batok kaniya.
Nakurat ang kaatbang nga grupo sa dihang siya ug kaubanan nagpatawag og press conference. Didto pintok niyang gitug-an ang kamatuoran samtang gibulgar ang grabe nga desinyo sa pangilad nga buot moguba kaniya ug sa partido.
Ang iyang mga kritiko sa pulitika nigamit sa tanang martilyo ug kusog aron lang siya ilansang. Kini gumikan kay si Chatto usa ka lider nga may kaugalingong mga hiyas---tarung, hugot og dedikasyon, matinud-anon, mapaubsanon ug dili tigpakaaron-ingnon. Siya dili moduko ug magpa-awot sa hakog ug maki-kaugalingon nga mga interes. Aduna siyay lig-ong prinsipyo nga naggiya sa iyang panerbisyo sumala sa kaubanan sa goberno nga nahibawo ug nakaila kaniya.
Mao man gani nga daghan ang mga pasidungog ug pag-ila nga iyang nadawat gikan sa nagkalain-laing institusyon. Lakip niini ang “Nobel Prize†sa pangpublikong serbsiyo sa Pilipinas---ang Lingkod Bayan Award gikan sa Civil Service Commission. Way laing pinili nga lider sa Bohol nga nakatugbang kaniya sa niini lang nga natad.
Siya naapil sab sa mga nahaunang gipasidunggan isip Ten Outstanding Boholanos Around the World (TOBAW) sa natad sa pangpublikong pangalagad. Sa iyang kabatan-on, si Chatto gipasidunggan sa Presidential Youth Leadership Award.
Ang Ramon Aboitiz Foundation niila kaniya nga usa sa pipila ka mga talagsaon ug mahinungdanong Pilipino sa Kabisay-an ug Mindanao.
Tataw ang iyang baruganan sa mga kontrobersiyal nga isyu sama sa Reproductive Helath Bill sukwahi sa buot ipatoo sa iyang mga kritiko.
Gumikan niini, si Chatto gipasidunggan sa Simbahang Katoliko Romano ug Human Life International isp “maki-Diyos, maki-kinabuhi ug maki-pamilya†nga mgababalaod.
Linkback:
https://tubagbohol.mikeligalig.com/index.php?topic=26746.0
