Ni Bobby Nalzaro
http://www.sunstar.com.phSaturday, April 28, 2012
GRUPO sa mga drug addict nga mitawag sa ilang kaugalingon nga Samahan ng mga Drug Adik, ang mi-apply og accreditation sa Commission on Elections (Comelec) isip partylist group. Gusto ning maong grupo nga mosalmot sa piniliay isip partylist aron aduna silay representasyon ngadto sa Ubos Balay Balauran sama sa ubang mga sektor sa katilingban. Ubay-ubay na kining mga partylist groups sa Kamara Baja karon bisan kon kining uban medyo kadudahan kon nagrepresentar ba gyud sa interes sa sektor nga ilang girepresentahan.
Ang ilang nominees dili man gani gikan sa ilang han-ay. Sama sa grupo sa mga security guard nga diin si kanhi presidential son ug Pampanga Congressman Mikey Arroyo mao ang milingkod isip representante sa maong grupo. Pero unsaon ta man nga mi-qualify man sila. Ang uban mga labor groups ug kining mga walhong pundok nga midaghan na kaayo. Pero mas maayo kining sa hawanan sa Kongreso ang ilang pagpakigbisog kay sa anha sa kadalanan o ba kaha magrebelde sila.
MGA ADIK
Pero makapa-alarma kining maong grupo sa mga adik nga gustong magpa-accredit sa Comelec. Samahan ng mga Drug Adik. Sa ato pa, aktibo kini sila karong mga adik. Naggamitan pa gihapon og drugas. Kay kon mga kanhi drug addict ni sila, ila untang tawgon ang ilang grupo nga ‘Samahan ng mga dating Drug Addict’ o ‘Mga nagrepormang Drug Addict’. Sus, kon i-accredit kini sa Comelec, pagkadakong baliw niini. Kuyaw ra ba nga makahakot kini sa gikinahanglan boto aron makalingkod ang ilang nominees kay puwerting daghanang mga drug addict karon.
Ang Ladlad, grupo sa mga bayut, homesexual ug mga tomboy, wala mahatagi og accreditation sa Comelec niadtong miaging eleksiyon. Unta kining maong grupo nagkinahanglan og igong representasyon sa Kamara Baha. Immorality lang ang isyo. Hinoon, daghan namang mga pinili diha sa Kongreso nga susama kanila. Daghan nang mga mahuyang diha. Aduna na silay representasyon. Pero kining grupo sa mga drug addict dili ni angayan usab nga hatagan og accreditation isip partylist. Unsa may ilang adbokasiya, i-legalize ang drug addiction? Baliw na.
DAGHAN NA
Alang kanako, wala na kinahanglana ang dugang pang partylist. Daghan na kaayo na sila sa Kongreso ug kon wala ako masayop halos tanang sektor na sa katilingban ang aduna nay representasyon sa Kongreso. Nag-usik-usik lang kana sa dugang pundo sa kagamhanan. Tiaw ba nimo kanang pareho silag gidawat sa piniling mga kongresista. Unya wala silay kaugalingon nga distrito. Sama nianang mga walhong pundok. Wala kitay kalibutan kon gi-unsa paggamit kanang ilang Priority Development Assistance Fund (PDAF). Wala kitay kalibutan kon gipamalit ba kana nila og armas o bala alang sa mga rebelde nga maoy gigamit sa pagpatay sa atong mga sundalo.
Linkback:
https://tubagbohol.mikeligalig.com/index.php?topic=49841.0
