PAGPAKAMATINUD-ANONNasinati ning panahona ang GRABE NGA DESINYO SA PANGILAD batok sa katawhang Bol-anon. Kini gilangkub sa malisyoso nga pagtu-is sa mga panghitabo aron gub-on and reputasyon ni Kong. EDGAR M. CHATTO. Si Chatto usa ka tinamud nga alagad sa publiko kinsa gipasidunggan sa panerbisyo ug liderato sa bisan unsang kapasidad nga iyang nahuptan. Way kahadlok nga gisabwag ang mga bakak aron sab bungkagon ang Lakas-Kampi-CMD pinaagi sa pagdaut sa matinud-anon ug mibarug nga mga lider ug sakop sa partido.
Ang mga bakak ug lipat-lipat nga isyo naglakip ning mga mosunod:
1. Nga dili makiangayon nga gibasura ang kagustohan ni Catigbian Mayor Roberto Salinas nga magkongresista sa Unang Distrito
Sumala nila ni kanhi Political Affairs Sec. Gabriel Claudio ug Gob. Erico Aumentado, ang Unang Distrito usa ka “sona sa kalinaw†alang sa sabot-sabot tali sa mga kampo ni Chatto ug Herrera. Apan samtang himoon ang mga diskusyon, si Salinas kalit lang nga giduso sa pagkakongresista. Siya niangkon nga giingnan ni Aumentado nga palansaron sa pagkakongresista. Kini gihimo nga way pagkonsulta ug kortesiya ngadto kang Chatto kinsa maoy tsirman sa Lakas-Kampi-CMD sa distrito niadtong higayona. Nitug-an si Salinas kang Chatto nga giduol siya sa representate sa kampo ni Villar, ug dayon ni Danao Mayor Thomas Gonzaga, hangtud ni Aumentado na gayud. Matinud-anong gitambagan ni Chatto si Salinas sa dili pagdali-dali kay giduso niadtong higayona ang sabot-sabot kalabot sa Unang Distrito. Kini mao say rason nganong wa nikomitir si Chatto og bisan unsang suporta ngadto ni bisan kinsa sa pagkakongresista. Kini gipalanog sab atol sa tigum sa mga lopisyales sa lungsod ug barangay sa Catigbian pinangunahan ni Salinas ug Bise Mayor Necitas Digaum.
Bisan pa man niini, si Salinas nagsigeg suroy sa kalungsoran sa Unang Distrito, kauban pa gani ang mga grupo nga di iya sa partido, ug nanaud og mga tarpaulin o propaganda sa tibuok distrito. Wa nanominar si Salinas isip opisyal nga kandidato sa Lakas sa pagkakongresista. Apan nganong si Chatto ang iyang basolon?
Bisan ang iyang mga lider sa kabaranggayan nakasabot sa mga sirkumstansiya nganong napakyas siya sa pagkuha sa nominasyon. Sa kaugalingon nilang pulong, ang mayor wa nikonsulta kanila sa iyang planong magkongresista. Ang ilang pagtoo mao nga siya nangandam apan para sa reeleksyon isip mayor. IKini iya lang nga gihisgotan ngadto sa ubang opisyales sa lungsod, kinsa nakurat sa giingon sa mayor nga “Magduwa-duwa ta ning higayona; Lakas sa ta karon apan NP sa katapusan.†Wa sila nagdahum nga nalitok kadto sa ilang mayor, ilabi na ang pagbudhi sa partido, hangtud nga si Salinas ug pipila sab ka mga mayor ang nipirma og manifesto batok sa mga lider sa lakas. Ang ilang pagtoo nakumpirmar sa dihang gitapok sila ni Salinas human nigawas ang manifesto. Sila gimandoan sa pag-uban kaniya ngadto sa NP.
Ang hukom sa paghulma sa koalisyon sa Lakas-Kampi-CMD ug LDP usa ka kolektibo nga aksyon. Kini napamatud-an sa pinirmahan nga dokumento ngadto ni Lakas National Chairman Gibo Teodoro, kinsa kandidato sa Lakas sa pagkapresidente, niadtong Nobiyembre 24, 2009. Ang samang suwat gipadala ngadto kang Aumentado isip rehiyonal ug probinsiyal nga tsirman sa partido kaniadto. Ang duha ka dokumento gilagdaan nila ni Chatto, Sec. Arthur Yap, Kong. Roberto Cajes, Kong. Adam Relson Jala ug kanhi Kong. Eladio Jala.
Atol sa pag-apud-apud sa mga Certificate of Nominationa and Acceptance ( CONA) sa Hotel La Roca sa syudad sa Tagbilaran niadtong Nobiyembre 28, 2009, gipalanog ni Aumentado ang iyang pagsuporta sa koalisyon sa Lakas-Kampi-CMD ug LDP. Siya nideklarar, “Nalipay ko nga bisan dunay mibiya kanato nga atong mga kauban sa partido, duna say lig-on nga misulod sa atong partido ubos sa koalisyon Lakas-Kampi-CMD ug LDP nga gipangulohan ni Sen. Angara ug ang ato nga coalition partner nga mao usab kini ang atong kandidato sa congressman. Ang atong gubernatorial candidate maoy mopahibalo niini. Sa way lipud-lipud ako mosuporta ni kanhi Gob. Rene Relampagos pagkarepresentate sa Primero Distrito kay usa kini ka conciliating factor; nga duna kitay nawala apan daghan ug daku nga pundok ang mibali ug mopuli sa mga mibiya kanato.†Ang deklarasyon ni Aumentado gisugat sa makabungog nga pakpak sa mga sakop sa partido, lakip ang mga kandidato sa kalungsoran.
Busa klaro kaayo nga adunay pagdasun ang lokal nga partido sa koalisyon. Hilabihan sab ka tin-aw nga si Salinas way basehanan sa iyang pagbasul kang Chatto ug sa partido sa iyang kapakyas sa pagkuha sa nominasyon.
2. Ang manipulasyon nga nakaingon sa pagrebukar sa CONA ni Aumentado sa Segundo Distrito usa ka ebidensiya sa pagtraydor kay ang mga nagpaluyo niini naghuwat hangtud sa katapusang minuto sa pagsang-at sa kandidatura sa Desiyembre 1, 2009 sa wa pa ibutyag ang rebokasyon
Sa buhing interbyu sa “Inyong Alagad†sa DYRD sa Disyembre 2, 2009, gipasabot ni Lakas National Secretary-General Francis Manglapus ang mga hinungdan sa rebokasyon, apil ang mga lihuk nga makadaut sa interes sa partido. Iyang giklaro nga way kalabotan ug way kasayoran si Chatto sa rebokasyon. “Way konsultasyon nga gihimo tali kaniya (Chatto) kay kini gipaagi sa daghang ang-ang sa pulitikanhong intelihensiya, ug nga kini dili kalit nga desisyon bisan pa man kon matawag nga rebokasyon sa katapusan nang minuto,†sumala ni Manglapus.
Ang rebokasyon sa CONA ni Aumentado linugdangan sa kaugalingon niyang buhat. Ang motibo sa iyang NGILNGEG NGA ESKEMA sa pagbutang og duha ka linya sa Bohol aron silbehan ang interes sa duha ka partido---Lakas ug NP---hilabihan ka tataw ngadto sa mabuot nga mga Bol-anon. Kini klaro ra kaayo aron itago ug dali nga mamatikdan bisan lamang sa pagsabot sa mga panghitabo ug mga tawong nalambigit niini.
Atong gidasunan ang hunahuna sa mga namirma sa manifesto sa kasilag nga “ilang gisud-ong ang 2 ka panghitabo uban ang kaguol ug kadismaya.†Apan ato sab nga isulti dinhi nga kini nalikayan unta kon aduna pay mga konsultasyon sa wa pa ang ulahi ug apeke na nga pagtunol ni Aumentado kang Chatto sa pagkatsirman sa Lakas sa probinsiya. Kini gihimo ni Aumentado sa Nobiyembre 28, 2009 o tulo na lang ka adlaw ngadto sa deadline sa pagsang-at sa mga sertipiko de kandidatura o Certificate of Candidacy (COC). Dili nila mabasul ang liderato sa partido sa Bohol karon kay kami nagtamud sa normal nga proseso sa konsultasyon nga angay untang gihmo.
3. Ang pagbutang og mga kandidato kontra sa mga matinud-anong sakop sa partido nga sama sa nahitabo sa mga lungsod sa Talibon, Getafe ug Dagohoy
Si Kong. Cajes adunay mga hinungdan sa paghimo niini kay siya maoy kasamtangang kongresista sa Segundo Distrito. Si Chatto naningkamot sa pagpatigbabaw sa kaangayan hangtud sa katapusang gutlo bisan pa man kon ang mga mayor sa Dagohoy ug Talibon nagpadayag na og suporta kang Villar ug Herrera bisan sa sinugdanan pa lang.
Sila si Aumentado ug Cajes nagkasinabot nga isaka ang maong isyu sa Dagohoy, Talibon ug Getafe ngadto sa National Party Headquarters kay susama man ang kahimtang sa tulo ka mga lungsod. Sa laing bahin, ang kahimtang sa Unang Distrito maoy gitutokan ni Chatto isip tsirman sa partido sa distrito. Busa dakung binuang nga ipahid nagdto kang Chatto ang kaguliyang karon sa Segundo Distrito. Sa makausa pa, kini laing bunga sa tinuyo nga paglangan sa pagtunol sa provincial party chairmanship gikan ni Aumentado ngadto kang Chatto.
4. Ang 12-0 nga resulta o pagdaug sa tanang 12 ka senador sa Lakas sa Getafe, Dagohoy ug
Buenavista sa eleksyon sa 2007 kabahin lang sa kinatibuk-ang kadaugan sa partido sa Bohol. Gisuwerte lang ang maong mga lungsod kay wa naapil sa mga lungsod diin ang mga sampol nga balota nga naggikan sa Governor’s Mansion aduna nay ngalan sa kandidato sa NP ug ubang tagapikas partido. Ang maong mga balota gikatag bisan og nagsige kunohay og pasabot si Aumentado nga kinahanglang 12-0 gyud ang resulta pabor tanan sa Lakas.
Ang 12-0 nga resulta kaniadto dili makagarantiya nga ang samang loyalty ngadto kang Pres.
Gloria Macapagal Arroyo niadtong eleksyona mao pud ang loyalty nga ikahatag ngadto kang Gibo Teodoro karon kinsa kandidato pa lang ug dili usa ka naglingkud nga presidente. Ang estelo sa lipat-lipat inanayng nasubli karon. Kini inanay sab nga nagkagrabe. Apan mapasalamaton ang katawhan kay ang mga nagbinuang napugos ra sab sa pagbulgar sa ilang kaugalingon samtang sayo pa.
Ilang giintriga sa manifesto nga ang Balilihan ni Chatto ug Trinidad ni Cajes wa ka hatag og 12-0 nga resulta para sa Lakas sa 2007. Pero wa nila tug-ani ang katawhan nga ang lungsod mismo sa Ubay ni Aumentado nakahatag lang og resulta nga 9-3. Managsama ang resulta sa Balilihan ug Trinidad, 11-1. Kinsa man karon ang lider nga wa nitunong?
5. Sa wa pa ang Nobiyembre 28, 2009, way gihimo nga tigum sa partido o konsultasyon. Ang liderato sa Lakas sa Bohol gitunol ngadto kang Chatto sa maong petsa nga hapit na matapos ang pagsang-at sa kandidatura. Kon buot kwentahon, si Chatto gitugyanan sa party chairmanship apan sa nahuman na ni Aumentado sa pagplastar ang iyang mga kandidato sa Segundo ug Tersero Distrito nga way konsultasyon ug kortesiya. Wa kini kalainan sa pagtugyan ngadto sa bag-ong kapitan sa usa ka lumalargahay na nga barko kansang mga tripulante pulos na diay mga pirata!
Ang pagkasi-ak sa partido maoy natural nga linugdangan sa grabeng desinyo ni Aumentado sa pagporma og duha ka mga linya sa probinsiya. Si Chatto igo na lang nga gibinlan ug nakasunod sa kaguliyang sud sa Lakas-Kampi-CMD. Ang maong talan-awon natataw nang daan sa dihang nilukso si Herrera sa NP samtang gituyo nga magpabilin sa Lakas ang ilang mga suod aron masilbehan ang iyang interes ug sa NP.
Di kahibudngan nga si manlalaban Tomas Abapo, kanhi provincial administrator ug pikas nga dagway ni Aumentado, kanunayng nagpasiatab nga adunay mga mayor nga Lakas lang sa papel. Kini sila mga Lakas sa nawong apan NP sa dughan ug binuhatan. Ang ilang manifesto subo nga nagkumpirmar niining tanan!
Bisan sa ruling sa Comelec nga si Aumentado maoy opisyal nga kandidato sa Segundo Distrito, ang samang desisyon pabiling giapelar. Kini nagpasabot nga kay wa may pinal nga hukom, si Aumentado ug Trinidad Mayor Judith Cajes padayong magkumbati kon kinsa gyuy opisyal nga kandidato sa partido.
Ang mga nilagda sa manifesto nisaway sa nasudnon og probinsiyal nga liderato sa partido nga kuno nibaliwa sa ilang mga hilak. Apan sa laing bahin ilang gikumpirmar nga si Chatto ug ubang lider sa partido kanunayng nagtawag og mga tigum sa kalungsoran ug kabaranggayan. Kini maoy nabaniog nga matang sa panggoberno ug liderato ni Chatto nga adunay partisipasyon. Kanunayng may konsultasyon tali ug hangtud sa labing yanong lider sa kabaryohan. Bisan og gipahibawo sa mga tigum, ang mga nagbinuang sa partido nagdumili sa pagtamud sa imbitasyon. Ang grabe pa gyud kay ang ilang tinuyo nga absensiya maoy gihimong alibay o pasangil nga naka-ingon sa tanang kaguliyang ug kalibog karon.
Kini usa lang ka ehemplo. Ang pagbisita ni Gibo Teodoro sa Bohol sa Pebrero 21 ning tuiga nagtanyag kanato og laing kahigayonan sa pag-ila sa mga nagmaskara ug mabudhion. Kay unsaon man nila sa pagpasabot ang ilang pag-adto sa syudad sa Sugbo aron makigtagbo kang Villar sa samang petsa samtang si Gibo Teodoro ug mga matinud-anong sakop sa Lakas nagtapok sa Balilihan sa birthday ni Chatto? Gipada ngadto kanila ang mga tukmang notisya sa pag-anhi ni Gibo Teodoro. Kinsa karon ang mga tigpakaaron-ingon, traydor, bakakon ug tigrason ginamit ang lonlon alibay?
Makapasubo uyamot nga kinsa kadtong nagpatoong biktima sa pagpakaaron-ingnon ug pagbudhi mao diay mismo ang nagbuhat og malisya. Labing pait kon kini nahimo nang pamaagi sa tanan nilang pamulitika.
Kini nagtukmod kanato ngadto sa di malikayan nga pangutana: Nganong nakahimo sila niining tanan kon ugaling nagmatinud-anon sila sa partido sud sa daghang katuigan?
6. Nga ang liderato ni Chatto inutil ug di epektibo
Ang liderato maoy isyu nga buot---ug mas gusto---namo nga pahukman sa katawhan. Mapaubsanon namong isulti dinhi nga ang liderato maoy argumento nga di namo sibugan. Apan ang liderato dili maoy isyu dinhi. Kini mahitungod sa usa ka GRABE NGA DESINYO SA PANGILAD ug PAGKADILI-MATINUD-ANON --- o KAMATINUD-ANON LANG NGADTO SA INTERES ---sa pagmugna og duha ka linya aron silbehan og gamay ang Lakas samtang hingpit nga tagbawon ang NP. Sama kini sa pagbusog sa NP hinungitan sa pagkaon sa Lakas.
7. Nga ang mga namirma sa manifesto gitratar nga second-class citizen sa Lakas
Lain na usab kini nga alibay aron aduna kunohay lehitimong rason nga mobiya sa Lakas ug gawasnon na nga mokampanya sa NP.
8. Nga si Aumentado napilde sa Balilihan sa eleksyon sa 2004
Napilde si Aumentado sa Balilihan di lang sa 2004 apan usab sa eleksyon sa 2001. Hinuon ania ang labing tinuod nga kwentada. Ang record sa Comelec nagbutyag nga sa 2001, Si Aumentado gibiyaan ni Relampagos og 2,253 botos sa Balilihan. Nag-uban niadtong eleksyona si Relampagos isip gobernador ug Chatto isip iyang bise. Nidaug si Aumentado sa tibuok Bohol. Sa ilang engkwentro sa 2004, si Aumentado, nga mao nay gobernador, napilde ni Relampagos sa samanag lungsod apan sa labaw nga 52 na lamang. Kini nagpasabot nga nadugangan og 2,201 botos si Aumentado kon itandi sa eleksyon sa 2001. Kini nahitabo kay si Aumentado nag-uban na man og si Chatto sa 2004 nunot sa unification niadtong eleksyona. Ang numero di mamakak.
9. Nga si Chatto makabenepisyo sa suporta sa mga kandidato sa LDP sa pipila ka mga lungsod
Angay lang nga tul-iron ang bakak kay wa nahitabo nga giingnan ni Chatto si Relampagos nga isyuhan og LDP CONA ang mga kontra sa Lakas. Gani, si Aumentado mao mismoy nikontak ni Relampagos aron hatagan og LDP CONA ang mga kandidato sa pagkamayor sa Ubay ug Getafe. Nakurat gani si Chatto nganong wa nagkuha si Aumentado og Lakas CONA para sa Getafe nga unta si Aumentado man mismo ang nagpahigayon sa pagpagawas og mga kopya sa CONA gikan sa National Lakas Office para sa Dagohoy ug Talibon. Kini napamatud-an pinaagi mismo sa mensahe ni Aumentado ngadto sa Lakas National Office nga nangayog Lakas CONA para sa Dagohoy ug Talibon.
Kining tanan dili mga pasangil ug alibay. Kini mao ang LABING MATUOD NGA PANGHITABO---ang LONLON nga KAMATUORAN.
Ning panahon nga nagnihit ang konsensiya, kinahanglang batokan ang tanang pagsuway sa paghilo sa hunahuna sa katawhan. Uban ang atong lig-on nga pagtoo ug pagsalig---ug isip katawhan nga gigasahan og kaalam para sa kaayohan---dili kita masaag sa angay natong padulngan.
Kami kumbinsido nga tali sa pagpakaaron-ingnon ug pangilad, gaan ang dughan kon ang katarung maoy pillion. Nunot ning maong konbiksyon, KAMI MODEKLARAR---ug SUBLI NGA MOPALANOG---uban ang kusog sa among konsensiya ug kapasidad, SA PAGPABILIN NGA NAGHIUSA, NAGSUPORTA UG KOMITIDO ubos sa liderato sa partido ni Kong. EDGAR M. CHATTO, opisyal nga kandidato sa pagkagobernador. SIYA MAOY LABING TAKUS NGA MANGULO UG MODUMALA SA BOHOL sa mosunod nga katuigan bisan og unsa ka bangis ang mga bakak batok kanato ug sa katawhang Bol-anon.
Og ning laing higayon sa paggamit sa sagradong katungod sa pagboto, atong ipangaliya ang paggiya kanato sa Labaw'ng Makagagahum.
PADAYON BOL-ANON
Linkback:
https://tubagbohol.mikeligalig.com/index.php?topic=26309.0
Topic: PAGPAKAMATINUD-ANON! (Read 2170 times)