Ni Vincie L. Monterde
WA nay angay kabalak-an kadtong mga nangandam na alang sa eleksyon sa Barangay ug sa Sangguniang Kabataan (SK) sa Oktubre 25 ning tuiga tungod kay wa nay babag ang pagpahigayon niini.
Mao kini ang pasalig ni Kongresista Eduardo Gullas human nga gimando gyud sa liderato sa Kongreso ang paghinayon sa synchronize election.
Si Gullas nga usa sa nisang-at og balaudnon alang sa pag-uswag sa dungan nga eleksyon sa Barangay ug SK nitug-an atol sa press conference kagahapong adlawa nga mahinayon na gyud ang eleksyon .
Niadtong Dominggo, usa ka tigom ang gihimo nga gitambungan nila ni House Speaker Feliciano Belmonte ug sa pipila ka mga senador ug gituki ang 31 ka mga balaudnon alang sa pag-uswag sa eleksyon.
Lakip sa nitambong mao ang mga sakop sa House Committee on Suffrage ug Electoral Reforms.
Sa mao nga tigom gikasabutan nga i-lay on the table ang maong balaudnon.
Gihimo na sab ang laing tigom niadtong Miyerkoles ug naaprobahan gyud ang paglangay una sa pagtuki sa maong balaudnon sa botos nga 22-15.
Matod ni Gullas nga kon gipatambong pa ang mga proponent sa 31 ka balaudnon alang sa pag-uswag , segurado gyud siya nga silang pabor ang modaog ug way eleksyon nga mahitabo.
Kon napasar pa sab ang mao nga balaudnon, supakon gyud kini ni Presidente Benigno Aquino III.
Si Aquino mas pabor nga dayunon gyud ang eleksyon sa barangay ug SK sa Oktubre.
Ang mga proponent sa pag-uswag nangatarungan nga mas maayong gastuhon ang P3 bilyunes kapin nga gahin sa laing katuyoan inay sa eleksyon.
Kay bag-o pa sab nga nahuman ang lokal ug nasudnon nga eleksyon.
Gipatik sa mantalaang Sun.Star Superbalita Cebu sa Agosto 28, 2010.Linkback:
https://tubagbohol.mikeligalig.com/index.php?topic=31582.0
