MikeLigalig.com

By Rey Anthony Chiu
PIA - Bohol
 
  Sa bag-ong ebidensya nga mitumaw kalabot sa pagpusil patay ni kanhi Bayan Secretary General sa Bohol Victor Olayvar, mahimo nga ipasakag usab ang sumbong ginamit ang bag-ong kasayuran.

  Kini ang bag-ong pamahayag ni kanhi Police Provincial Director Arturo Evangelista, kinsa nagpasaka sa sumbong sa iyang panahon isip kinatas-an sa kapolisan sa Bohol.

  Matud ni Evangelista, nagdumili kaniadto ang asawa sa namatay nga mohimo ug pamahayag bisan gipatawag sa imbestigasyon, apan mipagawas kini ug pamahayag dihang gihimo ang Congressional Hearing on the extra-judicial killings dinhi sa Bohol sa milabay’ng semana.

  Kahinumduman nga si Olayvar, usa ka inilang bokal nga aktibista, gipusil patay didto sa Cantubod Danao niadtong Septembre 2006. Nakasaksi sa pagpusil patay si Joy Ayag maoy nagmaneho sa gisakyang motorsiklo. 

  Si Elena Olayvar, kinsa asawa sa namatay mibutyag ang iyang bana nakig bayloay sa text sa suspitsado nga una na nga gitaral apan napamatud-ang walay sala sa kakuwang sa ebidensya. 

  Gawas niini, gipaabot pa usab sa mga Bol-anon nga kahatagan na ug katin-awan ang uban pang mga gipasangil nga extrajudicial killings nga nagpanghitabo dinhi. 

  Kini usab samtang ang Department of Justice (DOJ) namahayag ang Task Force 211 padayong naghusay sa mga giingong extra-judicial ug political killings sa nasud, lakip na ang Bohol.

Linkback: https://tubagbohol.mikeligalig.com/index.php?topic=13115.0