Ang liga ni Mayor Salinas mao ang
samang grupo nga gigamit sa pagpahural
sa mga mayor kang Sen. Villar sa niaging tuig
--------------------------------------------------------------------------------------------------------------------------------
Ang League of Municipalities of the Philippines (LMP) nga gipangulohan ni Mayor Roberto Salinas mao ang samang liga nga gigamit sa pagpahural sa 25 sa 47 ka mga mayor sa Bohol ngadto kang Sen. Villar sa Nacionalista Party sa niaging tuig.
Kadto kabahin sa kalkuladong plano nga budhi-an ang partidong Lakas sa eleksyon ning tuiga.
Ang samang liga ubos kang Salinas maoy gi-mobilize niadtong higayona ug gani ang mga staff sa LMP maoy gipakontak sa mga mayor nga pahuralon kang Villar.
Si Mayor Exuperio Lloren sa Jagna maoy nagpasilidad o nagpahiluna sa kaubanang mayor nga makahural ginamit ang LMP.
Si Salinas nihatag og pagtugot kang Lloren nga gamiton ang liga sa maong pagtraydor ngadto sa partidong Lakas.
Si Lloren maoy nasundan ni Salinas sa pagkapresidente sa LMP sa Bohol.
Sa interbyu sa radyo ning semanaha, giangkon ni Salinas kalkulado na ang ilang mga lakang.
Apil sila si Salinas ug Lloren sa pipila ka mga mayor ug sakop sa Lakas nga nipirma og manifesto sa niaging semana nga nagsaway sa bag-ong liderato sa partido ubos kang provincial party chairman Cong. Edgar Chatto.
Hinuon kini wa ikatingala kay nasayran nang daan ang grupo nga tua gyud ni Villar bisan og nagpatoong loyal sa Lakas.
Linkback:
https://tubagbohol.mikeligalig.com/index.php?topic=26209.0
Topic: Ang liga ni Mayor Salinas mao ang samang grupo nga gigamit sa pagpahural sa mg (Read 2505 times)