Ang nahauna....
Di ba didto na kos BT uban ni Nethla?
Di ba si Nethla buntis atong panahona?
Di ba adunay nahiunang hitabo namo didto sa balay sa iyang ate? Sa may payag?
Ug kining higayona, usa lamang sa daghang mga bahin sa hataas ug mabulukong sugilanon uban niining babayhana?
Ngi-ob unta akong kalibutan kung wala pa kini moabot sa akong kinabuhi. Sama siya sa usa ka sulo nga naghatag og hayag sa nagpangitum kong dalan.
Bisan tood nagkahinigumaay kaming duha, apan dili unta kini mahitabo kay pohon pagkuhaon na ang kamot ni Nethla sa lalaki nga moay amahan sa iyang gisabak. Apan, lagi para nako ang kinabuhi nako uban ni Nethla sama sa naglubong og minatay. Kung isulod na gani ang lungon sa panteyon, anha na ta motyabaw. Di naman tingali magdugay, ihalad na ni Nethla iyang kinabuhi uban sa laing lalaki, isinggit ko nalang sa hilom akong pagtutol. Sulod niining lawak abutanan, ipakanaog ko ang akong kabangis ug walay makapugong niini bisan pa'g samokon ko sa mga tiki sa bongbong nga nagpangidhat sa ilang nakaplagang panihapon. Mag-iayahay lang ta mga tiki og kaon. Way agdahay. Mag-ija-ija ta ug mag-aho-aho.
Unsa kaha ang naas sa hunahuna ni Nethla karong gutloa? Naa kaha siya'y gitagong pagbati gawas sa pagmahal nako? Naghulat kaha siya nga akong ingnon nga magtaban mi? Musugot kaha siya og molangyaw mi sa laing dapit aron didto pagasugdan namo ang bag-ong kinabuhi? Usa ba lang kaha kini ka lit-ag aron pagdakop kanako aron dili na ako maka-ikyas sa iyang hugot nga pagkubot kanako?
Sukad masukad wa pa gyud nako masukna kining bahina sa among pagbati. Matag higayon naa kos iyang atubangan, di naman ko tugkan og kaisog aron sutaon kining tanan. Manghuwoy man dayon akong tiil ug dili na makapadayon pag-sulti. Murag tawong palahubog nga nakakita lang sa usa ka galong tuba, wa na managad pagpauli kay gapunay na'g yarok sa ilimnon. Ug ingon ani ko karon. Nagsige na lang kog sud-ong aning talan-awon sa akong atubangan, ug wa na ko manumbaling ug mamati sa kinasikas sa gawas.
Gani karon....karon....ang akong mata naa niining gamayng binuhat nga nigimaw sa iyang paa, kining awom; ug wa damha, akong tudlo gapunay na og kusnit, sindang hawok mura'g langgam tikarol nga nagkusnit-kusnit sa buko sa kabao kay nakakita og makaon. kuto tingali kadto. Ug ang kamot ni Nethla mura sad og ikog sa kabaw, nagpunay og lapdos, pinahinay, sa akong nawong inubanan sa tig-ik kay gigilokan.
Ang nanghuwoy kong tuhod nikamang nas sawog; ug gibati kog daw adunay nikamang sa ilawom sa akong tiyan nga nikanaog sa akong pus-on ug nanginit dayon akong dunggan...akong nawong...akong agtang...akong liog...akong dughan ug tibook kalawasan. Mura kog gihilantan.
Linkback:
https://tubagbohol.mikeligalig.com/index.php?topic=18186.0