Mierkoles.
Didto nako nag-atubang sa gate sa bag-ong balay nila ni Kris. Dako naman diay ang kabag-ohan sa ilang lugar sukad sa akong katapusang pagbisita niya tulo na katuig nga milabay.
Sa akong pagsulod, nabati ko ang tingog ni Kris nga daw awit sa akong pangdungog. Ug nagtagbo ra gyud sa katapusan ang among duha ka mga dalan nga sulod sa dugayng panahon wala na tawn maduaw. Nagkinumustahay. Diha pa gani kamiy beso-beso. Pagkahumot niya. Bag-o pa gyung ligo.
Daghang kaayo kami og mga gibalik nga mga kaagi ug panghitabo sa among tagsa-tagsa ka kinabuhi. Wa namo damha nga nilabay na diay ang kaudtohon. Kamolong sulti ni Kris, sige lang pod tawn ko og sud-ong sa iyang panagway. Gisubay ko pagbalik ang iyang nawong sa akong mga nagkayo nga mga mata. Usa ka butang nga misantop sa akong hunahuna, kasayang!
Kadumdum nga didto pa gyud mis gawas sa ilang balay nagstoryahanay. Bisag dihay gilamok, wa jud nako to tagda.
Tood man miabot ang usa ka tawag. Gikan sa iyang uyab. Wa ko manumbaling sa ilang gipanagstoryahan bisan og madungog nako kini ug ang katawa ni Kris sulod sa ilang balay.
5 ka minutos ang milabay. 7. 8. 9. 10....15. Didto sa kos gawas. Ako rang usa. Di ko boot hunahunaon nga mura na kog gikalimtan niadtong tungora sa akong gimahal. Human sa 25 minutos, nibalik siya. Malipayon. Ug ako kaulion na gyud. Gisakitan. Gaselos. Gibati og dyutang kahiubos.
Ug ako siyang giingnan, "Syaro wa man jud ka manumbaling na nako. Kabalo man unta ka nga dia kos gawas." Ambot sakto ba kadtong akong gisulti. Apan, unsay iyang mahimo, ako man jud tong gibati. Wa siya makatingog.
Niuli kos among lungsod. Mao na kadto ang katapusan nakong komunikasyon ni Kris.
Milabay ang pila ka buwan, nakadawat kog tawag gikan ni Kris. Gusto niya nga moadto kos ilaha kay naa siya'y boot isulti nako. Wa ko kabalo og unsay akong buhaton niadtong tungura, nakaingon lang ko og OK.
Didto na kos ilang balay usab. Human nako gikahimamat iyang ginikanan, gitawag ko ni Kris ug gipasakay kos iyang kotse. Ug unsa kining iyang plano, wa ko masayod. Dili pod ko boot mangutana. Igo lang ko nisulti nga asa man diay kono kami. Daw usa ako ka lusay nga nagpaanud na lang sa bulhog sa kahigayonan. Unsa pa bay gusto niya nako karong panahona.
Laktod pagkasulti, didto kami sa usa ka mahalon nga kan-anan sa iyang dapit. Nangaon mi. Wa ko kasabot sa akong gibati. Puro pangutana ang sulod sa akong hunahuna. Ang akong mga storya niya para lang aron naa koy ikasulti. Nagpakaaron ingnon pod ko nga excited nga mahibawo sa iyang tuyo.
Ug miabot ang takna nga wala nako damha ang mahitabo atong gabhiona.
"Ok ra ka, don?" Matud niya.
"Ok ra man. Bahin sa unsa man na?"
Buntis ka? Maoy nisantop sa akong hunahuna. Sus, pila ka tuig nga akong giampingan iyang pagkababaye. Karon, buntis na siya sa iyang bag-ong minahal. Di matugkad akong bation kung ugaling mao kini iyang boot isulti.
"Don...Magminyo nako. Pakaslan ko ni Gerry."
Didto ko daw nahulog sa akong gitungtungan. Igo na lang kong ningisi ug nikahawid sa iyang kamot ug nipahalipay. Apan sayod ang langit, wa ko malipay.
Wa na ko motambong sa kasal ni Kris bisan iya kong gihangyo.
Wa na ko pakita niya sukad niadtong gabhiona.
Wa na ko magtoo kung aduna pa bay gugma.
Wa koy kanta'ng ikahalad alang kaniya.
Linkback: https://tubagbohol.mikeligalig.com/index.php?topic=18186.0
