Kung mawala ang suga sa imong tugkaran, ayaw na pud katingala. Ang airport kinahanglan ug suga apan gikawat. Naay purohan imong suga maoy isunod. Busa, hugti ang imong pagbantay karon.Na-leksyon Na Pud TaKining mga kawat ug lungkab nga nagapanghitabo sa Tagbilaran makahibulong kaayo ngano mi-grabe ni karon.
Tungod ba kaha ni sa kawad-on sa tawo? Apan miingon man si Arroyo nga miuswag daw atong ekonomiya? Kung milambo man ugaling, kinsa man kaha pud ang nabulahan?
Pero balik ta sa lindog sa atong hisgutanan karon. Kung nakahinumdum pa ta niadto nga dihay daghang mga kawat sa mga rebolto sa simbahan kay lagi mahal man ni ibaligya tungod sa iyang kakaraan, dili na ta matingala nga bisan mga gamit sa airport kawaton pa.
Kung walay respeto ang mga k******n sa mga butang sa simbahan, mo-respeto kaha sila sa tagdumala sa airport?
Diha nagsugod atong kakompyansa kay wa pa man ta makatugkad sa leksyon adtong mga nagkadaiyang kawat sa mga butang sa simbahan. Sakto na unta to nga pagtulun-an aron magmatngon ta sa atong mga kabalayan o bisan asa nga lugar.
Ang nahitabo sa airport laing pahinumdum nga hugtan pa nato ang atong pagbantay sa atong mga kabtangan ug kabalayan. Lahi ug lisud na ang panahon karon. Wa pa ni sukad mahitabo kaniadto. Karon lang jud ni.
Apan sa ako nang gikaingon sa unahan, daghan nang leksyon nga wala nato tagai ug pagtagad. Kining ka-kompyansa nato maoy usa sa mga hinungdan nga madisgrasya atong mga kabtangan.
Bisan didto sa Russia, dihay usa ka tulay ang gikawat. Ambot giunsa nila pagdajong to. Basta ang tibuok tulay ang nahanaw pagkabuntag. Kadtong maong tulay karaan ug kon ibaligja seguradong dako ug presyo.
Mao magbantay pa ta ug maayo kay basin ang sunod kawaton ang tibuok building sa airport o kaha ang tibuok terminal building sa pantalan. Wa ta mahibawo. Kinsay magdahom nga suga sa airport kawaton.
Our best defense is our offense. Kamo nay mag-igo kon unsay inyong defense. Lahi-lahi man ug sitwasyon ang kada tawo ug lahi-lahi usab ug paagi sa pagbantay.
Manghinaut lang ta nga mahibalo ang atong pangagamhanan kung asa to gibaligya tong mga suga sa airport. Di man pud mahalin to kung iprenda. Di pud to mahimong i-garantiya para ibayad sa utang sa masyaw ug tong-its. Naa gyud buyer adto.
Ang tawo dili mokawat ug walay buyer. Gawas kung usa ka silopin sa pan lang ang kawaton kay dili na kinahanglan ug buyer ana.
Seguro mao ni sulbad sa kawat sa airport. Pangitaon ang buyer. Pangutan-on ang manufacturer kinsay mga tigpalit nila ug suga sa airport.
Kung mawala ang suga sa imong tugkaran, ayaw na pud katingala. Ang airport kinahanglan ug suga apan gikawat. Naay purohan imong suga maoy isunod. Busa, hugti ang imong pagbantay karon.
Linkback:
https://tubagbohol.mikeligalig.com/index.php?topic=9808.0
