Sakop sa 4Ps, may P4,650
dugang sa cash grant, rice
TAGBILARAN CITY, Bohol, April 7, (PIA)—Kadtong mga banay nga sakop sa Pantawid Pamilyang Pilipino Program (4Ps), makadawat pa sila og hinabang, gawas sa ilang regular nga cash grants ug rice subsidy, aron ilang makompleto ang tag P6,000 nga hinabang sa kagamhanan ngadto sa mga kabus nga apektado sa Coronavirus disease (COVID-19).
Kini ang unod sa Joint Memorandum Circular No 1, series of 2020, nga naglatid sa Emergency Subsidy Program (ESP) sa kagamhanan nga ipatuman pinaagi sa Social Amelioration Program (SAP) sa mga ahensya nga nalakip niini.
Segun sa JMC, ang ESP ihatag sa nasudnon nga kagamhanan, pinaagi sa nagkadaiyang SAP sa mga nasudnon ug local nga ahensya, nga kwentahon subay sa kasamtangan nga rehiyonal nga sweldo nga inadlaw.
Kini usab magbase sa kadak-on sa nadawat na nga subsidy ilawom sa Conditional cash Transfer (CCT) sa Department of Social Welfare and Development (DSWD) nga maghatagan na nga daan sa cash grants ug sa rice subsidy.
Gibanabana na nga ang matag banay nga sakop sa 4Ps, nga may 3 ka anak ug may binuwan nga P500 alang sa health allowance, “makadawat pa og P 4,650.00,” segun pa sa saysay ni Social Welfare and Development Bohol Team Leader Rhea Marie Tubongbanua, didto sa Kapihan sa PIA.
Matud sa sa Republic Act 11469 o ang bayanihan To Heal As One Act, ang ESP ipatuman sa duha ka buwan: ang mga buwan sa Abril og Mayo sa 2020.
Kini nga cash grant o hatag nga salapi, sahi pa sa Food ug Non-Food Items (FNI) lakip na ang gikinahanglan nga mga gamit alang sa personal nga pag-atiman sa lawas nga tigpanghatag sa DSWD sa panahon nga may moigo nga katalagman.
Sa laing bahin, ang DSWD mag-andam usab og mga pinutos nga pagkaon aron ipanghatag sa katawhan sa panahon sa pagpatuman sa kwarantina, aron pagseguro nga wala nay mga tawo nga manggawas pa, ug magkaduol na hinuon sa posibilidad nga magkatakod-takod.
Hinuon, segun sa kasabutan na sa Inter-Agency Task Force Technical Working Group (IATF-TWG) on social amelioration, ang panghatag sa DSWD, kini agi lamang og pagdugang sa hatag sa mga kalungsuran ug kabarangayan. (rahchiu/PIA-7/Bohol)
* Stay at Home and START YOUR OWN blog site, business or personal website, or e-commerce store at
www.wirenine.comLinkback:
https://tubagbohol.mikeligalig.com/index.php?topic=92463.0