Lubong sa pulis nga napatay abagahon sa Cebu city gov't
12/11/2007 | 06:51 PM
Nipasalig ang kagamhanan sa Cebu City nga abagahon ang gastuhanan sa haya ug paglubong ni PO1 Noriel Luage, kinsa napusilan ug napatay samtang nag-serve og search warrant.
Matod sa mga opisyales sa city government, tun-an usab nila ang posibilidad sa dugang hinabang alang sa banay sa pulis.
Nakadawat lang og pasidungog si Luage human masikop si Aristotle Aves, ang most wanted sa Sugbo.
Nakadayeg ang mayor sa gipakitang katakus ni Luage ug sa natampo niini pagsikop ni Aves.
Gihangyo ni mayor Tomas Osmeña sa publiko nga molusad og fund drive alang sa biktima.
Gisaway sa mayor ang tanyag sa Filipino-Chinese community sa Cebu nga P2,000 nga ganti sa mga pulis nga nakasikop kang Aves.
Alang kaniya, dili igo ang kantidad sa nahimo sa mga pulis aron mapabilin ang kahapsay ug kalinaw sa Sugbo.
Alang sa mga pulis, dakong kawad-on sa ilang kusog ang pagkamatay ni Luage.
Gihulagway sa hepe sa Criminal Investigation and Intelligence Branch, diin nahisakop si Luage, nga matinud-anon kini sa serbisyo.
Gi-cancel ang Christmas party sa CIIB ug ubang mga kalihukan sa kapaskuhan tungod sa pagkamatay sa usa sa mga sakop.
Napuno sa kaguol ug kasakit ang mga kabanay sa 29-anyos nga biktima. Gani ang asawa niini daw dili makadawat sa nahitabo.
Si Luage ni-graduate isip police niadtong September 2006.
Nadestino kini sa Station 3, vice-control section, ug katapusan kining nadestino sa CIIB.
Duna kini duha ka tuig nga anak.
Hatagan og scholarship gikan sa elementarya hangtud kolehiyo sa bugtong anak sa biktima.
Gitunol usab atol sa haya sa pulis ang tseke alang sa P2,000, nga ganti unta kang Luage sa dako niyang tampo sa pagkadakop kang Aves.
Linkback:
https://tubagbohol.mikeligalig.com/index.php?topic=7278.0
