BANSALAN, Davao del Sur -- Usa ka 26-anyos nga mag-uuma ang gitigbas-patay didto sa Sitio Pluto, Barangay Managa sa maong lungsod.
Ang insidente nahitabo alas 4:56 sa hapon niadtong Dominggo.
Gibutyag ni Police Chief Inspector Jeffrey Latayada, hepe sa Bansalan Police Station, nga namatay dayon si Sonny Boy Antic Ramos, dunay live-in partner, human gitadtad sa silingan nga alyas Buloy.
Ang biktima nahiagom sa hinanaling kamatayon mao nga wa na madala sa ospital.
Nasayran nga dihang nakita ni Pacifico Ramos Jr., 33, ang gidangatan sa iyang manghod, dali siyang mikuha og hait nga sundang dayon gitigbas si Buloy.
Gitataw ni Latayada nga si Buloy nahiagom og samad tinigbasan liog mao nga namatay sab dayon.
Hinuon, human sa duha ka duguong hitabo daling mitahan si Pacifico sa buhatan sa kapulisan.
Samtang gikalap kining balita, gipalawman sa kapulisan ang imbestigasyon aron masayran ang motibo sa krimen.
Gihikay na sab sa kapulisan ang kasong pagpatay batok kang Pacifico, kinsa gipaslak karon sa selda sa kapulisan. (Orlando Dinoy)
Gipatik sa mantalaang SuperBalita Davao Agosto 04, 2015.
Linkback:
https://tubagbohol.mikeligalig.com/index.php?topic=80681.0