MikeLigalig.com

Naglahong parang bula si Bryan Ang, vice president ng Citibank, isang higanteng dayuhang bangko sa Binondo branch.

Nagtatrabaho si Bryan bilang opisyal ng Citigold Wealth Management kung saan karamihan sa mga kliyente ay ang mga Tsinoy.

Hawak niya ang mga eksklusibong kliyente na may mga depositong hindi bababa sa P4 milyon.

Ayon sa Web site ng Citibank, mga eksperto ang namamahala rito pero lumilitaw na marami ang naloko ni Ang.

Nitong Agosto, nadiskubreng daang milyong piso ang nadispalko umano ni Bryan Ang.

Sa affidavit na ibinigay sa ABS-CBN News ng isang Citibank depositor, higit P10 milyon ang nawala sa kanyang time deposit.

Napeke umano ni Bryan ang pirma ng kliyente. Binago rin daw ang address para hindi makarating sa kanya ang mga bank statements.

Ayon sa Citibank, nangako si Ang nang mas mataas na interes sa aktwal na interes ng bangko at nagbigay sa mga kliyente ng matataas na referral fee na hindi ibinibigay ng Citibank.

Ayon pa sa ilang source sa bangko, naging maluho ang pamumuhay ni Ang.

Linggu-linggo, iba-ibang mamahaling relo ang kanyang suot. Katunayan, binayaran niya mula sa account ng isang kliyente ang isang mamahaling relo na nabili mula sa Lucerne, tindahan ng mamahaling relo.

Si Ang ay panganay na anak ni Manila Councilor Bernie Ang.

Nakausap ng ABS-CBN si Councilor Ang sa telepono at sinabi niyang dalawang linggo na niyang hindi nakikita ang anak.

Wala rin daw siyang alam sa gusot na kinasangkutan nito.

Tumangging humarap sa kamera ang ilang biktima ni Bryan dahil ilan sa kanila ay hindi pa nababayaran ng Citibank.

Hawak nila ang ilang time deposit certificates, na ayon sa bangko ay peke.

Ayon naman sa Citibank, sinibak at kinasuhan na nila si Brian Ang.

Bagama't patuloy ang imbestigasyon ng Citibank, nilinaw nito na "isolated case" ang nangyari at ginagawa nila ang lahat para protektahan ang kanilang mga kliyente. – Ces Drilon, Patrol ng Pilipino

Linkback: https://tubagbohol.mikeligalig.com/index.php?topic=31486.0