MikeLigalig.com

SuperBalita Cebu
Ni Sheila C. Gravinez
Monday, December 29, 2014


SUGDAN sa Bangko Sentral ng Pilipinas karong Enero 1, 2015 ang pag-withdraw sa karaang bank notes gikan sa sirkulasyon.

Ang demonetization process sa karaang peso bills magsugod sa unang adlaw sa Enero hangtod sa Disyembre 31 sa sunod tuig.

“Pursuant to the authority of the Bangko Sentral ng Pilipinas under Section 57 of Republic Act No. 7653, otherwise known as the New Central Bank Act, the replacement process of the New Design Series (NDS) banknotes consisting of 5-, 10-, 20-, 50-, 100-, 200-, 500-, and 1000-Piso deno­minations shall start on 1 January 2015,” tipik sa circular no. 863 nga giluwatan ni BSP Governor Amando Tetangco, Jr niadtong Disyembre 29, 2014.
 
Kini nagpasabot nga ang kwarta nga New Generation Currency, nga gi-release niadtong Disyembre 2011 nga pirmado ni Presidente Benigno Aquino III, ang bugtong dawaton isip bayad.

Matod niya ang karaang peso bills mahimo pa magamit isip pambayad sa serbisyo ug pagpalit og mga butang o pagkaon sa 2015, apan dili na kini dawaton isip bayad sugod Enero 1, 2016.

Ang karaan nga de­sinyo sa kwartang de papel ang gigamit sukad pa niadtong 1985.

Si Tetangco niklaro nga mahimong pailisan sa publiko ang karaang kwarta sa bag-ong currency bank notes sa mga banko ug mga buhatan sa BSP sa tibuok nasod gikan sa Enero 1 sa sunod tuig hangtod sa hinapos sa 2016 nga way bayad.

Siya nidugang ang ta­nang karaang kwarta nga di mapailisan sa gitakda nga panahon ang di na makonsiderar nga legal ug dili na magamit isip bayad sa normal transaction.

“After 31 December 2016, the NDS banknotes which have not been exchanged shall cease to be liability of the BSP and shall be demonetized. The BSP shall also demonetize all the NDS banknotes which have been called in and surrendered for replacement,” dugang ni Tetangco.

Alang sa mga Pilipino nga nagtrabaho sa gawas sa nasod nga mapakyas pagpailis sa ilang karaan nga bank notes mahimo nga morehistro online sugod sa Oktubre 1, 2015 hangtod sa Disyembre 31, 2015 pinaagi sa website sa BSP, sumala ni Tetangco.

Sila hatagan og usa ka tuig gikan sa adlaw sa pagparehistro pagpabaylo sa old bank notes sa mga buhatan sa BSP.

Sa kasamtangan, adu­nay 729 milyones kabuok ka mga karaang bank notes nga nagkantidad og P192 bilyones sa sirkulasyon.

Linkback: https://tubagbohol.mikeligalig.com/index.php?topic=79409.0