Sinulat ni Rey Anthony Chiu
Philippine Information AgencyBuot sa Pilipinas nga lumsan ang record nga natala sa Amerika sa dungan nga pagpatotoy sa mga inahan, ug niini, karong umaabot nga Agosto 8, gilaraw sa mga tigpasiugda nga mahitabo ang dungan nga pagpatotoy sa 16 mil ka mga inahan sa nagkadaiyang lugar sa nasud.
Kini nga lakang subay usab sa adbokasya nga ang pagpamalit sa mga gatas alang sa mga masuso (infant formula milk) mas gastoso pa kas sa libre nga pagpatotoy sa mga inahan sa ilang mga bata.
Gihingusgan karon sa Philippine Lactation Resource and Training Center (PLRTC) nga ipakatap ang kasayutran ngadto sa mga hepe ehekutibo sa mga local government units aron yam-iran na unta ang haylo nga sponsorships sa mga kompanya sa artipisyal nga gatas.
Matud sa PLRTC, ang pagpatotoy sa natural nga gatas sa inahan makaayo sa kasanihan sa inahan ug sa bata, makaayo sa ekonomiya ug magpalig-on sa relasyon sa mga banay.
Sa pagpalig-on ning adbokasya, samtang saulogon sa kalibutan ang World Breastfeeding Week sa Agosto 1-7, giawhag sa PLRTC nga mahatagan usab og gibug-aton dinhi sa nasud ang kasaulogan.
Sumpay sa PLRTC, migasto ang mga Pilipino og P25 bilyones matag tuig sa wala kaayo kinahanglana nga gatas nga gani, delikado sa kahimsog sa bata.
Kini nga gasto, mahimo na unta nga igasto alang sa mas gikinahanglan nga serbisyo sosyal," si Dr. Elvira L. Henares-Esguerra, ang Director sa Children for Breastfeeding, Inc mipadayag.
Sumpay niya, sa Pilipinas, ang mga kompanyang nagbaligya sa gatas, mag-import og formula milk nga mibalor og P3.1 bilyones unya mobaligya niini sa presyo nga pito ka pilo o P21.5 bilyones.
Ang mga ginikanan usab mogasto sa P536 milyones alang sa pagpalubong sa mga mabiktima nga 16 mil ka mga batang mangamatay sa ingon ani nga pagpatotoy.
P3.5 bilyones ang gigasto sa nasud sa pagpatambal ug uban pang galastohan sa mga bata nga masakit dala sa artipisyal nga gatas.
Gitumbok nga ang sakit nga hubak, kalibanga, pneumonia ug malnutrition, nakapawala sa kapin sa usa ka bilyong nga uholang nausik tungod sa pagpalta sa trabaho sa mga ginikanan.
Kapin sa 30% nga kita sa mga banay ang magamit aron ipalit og infant formula milk kon itandi sa libre nga pagpatotoy sa inahan, butyag ng Esguerra.
Ang gatas sa inahan ang bugtong sulit nga pagkaon alang sa puya ug mga bata kay kini nagpalig-on sa panalipod sa lawas sa bata batok sa sakit.
Ang pagpatotoy usab mapganalipod sa mga inahan batok sa hemorrhage, mga matang sa kanser, diabetes ug sakit sa bukog samtang nagtabang sa mga inahan nga makapahiuli sa iyang lawas gikan sa pagbuntis ug pagpanganak.
Linkback:
https://tubagbohol.mikeligalig.com/index.php?topic=3253.0
