Ni Brenda D. Batuto (Banat) Updated March 02, 2011 12:00 AM Comments (0) View comments
CEBU, Philippines - Nagisi ang ulo ug nabulit sa mga bun-og ang kalawasan sa usa ka ginang human
kini kulataha sa iyang dalagitang katabang didto sa barangay Dumlog, dakbayan sa Talisay niadtong Lunes sa hapon.
Ang biktima mao si Anna Rosario Sagayno, 34, minyo, ug residente sa maong dapit kinsa nagpakiluoy
sa suspetsado nga dili lang siya patyon tungod sa iyang mga anak.
Si PO2 Ivan Ray Juarez sa kapolisan sa Talisay kinsa maoy miresponde sa hitabo mibutyag sa
Banat News kagahapon nga posibleng may gitagoang kasuko ang 15 anyos nga dalagita
ngadto sa biktima tungod kay gisita kini kabahin sa Iphone.
Sa sayo pa ang unang amo (kansang ngalan wala ibutyag) sa maong dalagita nagduda
nga gikawat sa naulahi ang iyang iphone, hinungdan nga gisukit kini sa biktima.
Apan niadtong Lunes sa hapon dihang didto sa sulod sa iyang lawak ang biktima,
giingong hilom kining gisulod sa iyang katabang ug walay daghang langas,
gipusposan sa tubo nga puthaw ang iyang ulo ug dihang nagisi na kini, giligid pa gyud og bunal ang iyang kalawasan.
Dihang gibati na og kaluya ang biktima, mihangyo kini sa iyang katabang nga dili lang siya
tiwason og patay kay may mga anak pa siyang atimanon.
Dihang miabot na ang iyang bana, mao na kini misikop sa dalagita ug midala ngadto sa kapolisan.
Dihang gisukit sa mga otoridad, gipanghimakak sa dalagita ang pasangil batok kaniya.
Iyang giingon nga nadisgrasya sa motorsiklo ang biktima hinungdan nga nagisi ang bagol-bagol
niini ug nabulit sa mga bun-og ang kalawasan.
Sa pagka karon gitugyan sa kapolisan ngadto sa taga Department of Social Welfare
and Development ang maong dalagita.(/WC) (BANAT NEWS)
Linkback:
https://tubagbohol.mikeligalig.com/index.php?topic=38398.0
Topic: Amo gipusposan ug tubo sa maid (Read 1284 times)