Ni Guam P. Logroño
LAIN na sab nga hitabo nga natukma sa kantang “Too Much Love Will Kill You†ang nakapaukay sa mga lumolupyo sa Pinamungahan, Sugbo.
Kini human usa ka construction worker nipusil patay sa iyang hinigugma sa daruhan dayon nagpusil sa iyang ulo ug namatay kagahapon sa alas 11:20 sa buntag sa Sitio Mabini, Barangay Tajao, sa maong lungsod.
Nabuak ang ulo ni Rene Cano, kapin sa 30 anyos ang panuigon, human nilapos ang bala sa .38 revolver gikan sa tuong bahin sa ulo ulo babaw sa dungan nga nilapos sa walang bahin dihang iyang gidul-it sa pagpusil ang iyang kaugalingon.
Apan sa wa pa siya nagpakamatay, gipusil niyang daan ang iyang hinigugmang si Victoria Marter, 41, buwag sa bana, kinsa unom na ka tuig nga nagpuyo sa lugar apan lumad nga taga Mindanao.
Si PO1 Froilan Velasquez, imbestigador sa Pinamungahan police nga nahinabi sa Sun.Star Superbalita, niingon nga ang silingan sa biktima nga si Gaudiosa Herediano, 46,
nibutyag kanila nga gigukod ni Cano iyang hinigugma.
Nakadagan pa ang biktima apan pag-abot sa daruhan way swerte natumba kini hinungdan nga naapsan, diha-diha gipusil ang walang habig sa dughan ug gibiyaan.
Apan dihang nilakaw si Cano gikan sa daruhan nga gibiyaan nagbuy-od nga patay ang iyang hinigugma, mga 20 ka tiil ang gilay-on, nagpusil usab siya sa iyang ulo ginamit ang iyang revolver hinungdan sa hinilali niining kamatayon.
Pag-abot nilang mga pulis sa crime scene ang duha pulos na nagbuy-od diin didto ang revolver nga dunay tulo ka mga buhing bala ug duha ka mga kabhang.
Gidali nila sa pagdala ang duha sa tambalanan apan gideklarar sa mga doktor ga dead-on-arrival.
Ang motibo sa krimen, gugma, sumala pa ni Velasquez.
Ang anak ni Marter nitug-an sa kapulisan nga niadto pang niaging mga adlaw gustong mopauli ang iyang inahan sa Mindanao.
Apan ang suspek di mosugot nga mopauli ang biktima sa Mindanao hinungdan nga nagtoo sila nga kini maoy rason sa ilang panag-away.
Samtang dunay mga silingan sa lugar ang nipadayag nga niadto pang miaging adlaw ang suspetsado nagsigig bahis-bahis sa ilang dapit human nipauli gikan sa trabaho dinhi sa dakbayan sa Sugbo.
Wa hinuon masuta sa kapulisan kon unsay giawayan sa duha, apan posibling gibuwagan ang suspek sa biktima hinungdan nga di madawat niini sanglit nahibaw-an usab sa mga silingan nga duna silay relsyon.
Samtang giingong dunay laing gikapuyo ang babaye sa maong dapit nga toa karon nagtrabaho sa Negros.
Si Velasquez niingon nga dihang gigukod ang biktima, si Gaudiosa nitug-an nga nakapangayo pa og panabang si Marter apan way bisan usa nila ka mga silingan ang nakaduol tungod sa kahadlok.
Gani siya mismo nihangyo sa suspek nga di pusilon ang biktima apan wa gyud siya panumbalinga.
Dugang niini nga ang mga silingan nitug-an nga way bisyo ang suspek, hilumon, di manigrilyo, mo-inom, apan posibling di makadawat nga magkabuwag sila sa babaye hinungdan nga iyang gipatay ug nagpakamatay usab siya alang sa iyang grabeng paghigugma.
Gipatik sa mantalaang SuperBalita Cebu
Linkback:
https://tubagbohol.mikeligalig.com/index.php?topic=40982.0