Gidid-an magminyo sa GRO, nagpakamatay!
WA nay kinabuhi sa dihang nakaplagan si Rolando Tajares human naghikog tungod kay giayran sa iyang mga ginikanan ang hinigugma niini.
Nagbitay sa kisame sulod sa iyang kwarto ang ulitawo diin gigamit niini ang nylon sa paghikot sa iyang liog.
Matud pa sa taho, wala mosugot ang mga ginikanan sa biktima nga mangasawa kini sa iyang uyab nga usa ka Guest Relation Office (GRO) nga taga GenSan.
Si Tajares, 26 anyos, residente sa Sitio Nakar, Barangay Poblacion, Palimbang, Sultan Kudarat ang gusto na kaayong magpakasal sa iyang uyab apan misupak ang mga ginikanan niini.
Sa imbestigasyon nga gihimo sa Palimbang Police Office, bandang alas 7:20 sa gabii na sa dihang naabtan sa mga paryente sa biktima ang ulitawo nga nagbitay sa iya mismong kwarto ug aduna kini’y ‘suicide note’ nga gibilin diin gisuwat niini nga kung dili sila mahinayon sa iyang uyab sa pagminyo unayon na lamang niini pagkutlo ang iyang kinabuhi.
Sa nahitabo, sangko sa langit ang pagmahay sa mga ginikanan nganong ilang gibabagan ang plano sa anak. Emier Noval - Brigada News
Linkback:
https://tubagbohol.mikeligalig.com/index.php?topic=41045.0