Ni Blue Cordero
Saturday, January 21, 2012
Usa ka babaye ang gidunggab ug gikawatan sa iya mismong uyab didto sa Calinan, siyudad sa Davao.
Nahitabo ang insidente alas 9:00 sa gabii niadtong Biyernes.
Samdan sa dughan ug tiil ang biktimang si Rorelyn Gatchalian Ekling, 31, buwag sa asawa ug taga Purok 2, Barangay Biao Joaquin, Calinan hinungdan nga gidala sa balay tambalanan.
Samtang ang suspek nga misibat giila nga si Federico Angkol, 30.
Gitangag sa suspek ang duha ka mga cellphone sa biktima lakip na ang iyang kita sa sari-sari store.
Sa imbestigasyon nga gilusad ni Police Officer 1 Joanna Lomotos sa Calinan Police Station, nasayran nga naglalis ang mag-uyab tungod sa selos nga miresulta sa pagpanunggab sa suspek.
Dali siyang gidala sa Isaac Robillo Hospital sa Calinan apan gibalhin dayon sa Southern Philippines Medical Center kung diin padayon pang gi-obserbahan sa mga doktor ang iyang kahimtang.
Gipangita na sa kapulisan sa Calinan Police Station ang suspek aron nga manubag sa iyang gibuhat sa iyang uyab. --Gipatik sa mantalaang SuperBalita Davao Enero 22, 2012.
Linkback:
https://tubagbohol.mikeligalig.com/index.php?topic=46027.0