Fallen,
Di tanang mga babaye mag-bleed sa first sexual intercourse. Ingon sa akoang higalang doctor nga duha ang posibilidad niini. Ang una, tungod kay nipis ang iyang hymen, nagisi ni sa iyang mga physical activity, sama sa pagbiseklita ug uban pang mga lihok sa lawas nga moapekto sa hymen. Ikaduha, mao nga hayan baga ang iyang hymen hinungdan nga wa magisi dihang nag-sex mong duha. Matod sa akoang higala nga nakapaanak na siyag pasyente nga ang hymen intact. Iya ning gigisi sa pagpanganak. Virgin siyang nanganak.
Yuna pa, ingon niana diay ka mabaw ang imong pagtan-aw sa gugma sa babaye? Nga ang gugma nimo sa babaye masukod pinaagi lang sa hymen? Or mahigugma ka tungod lang kay virgin siya? While mas maayo gyud nga virgin ang babaye during marriage, apan unfair sab nga manghilabot ka kon birhen ba siya o di. Kay ang virginity di makita masuta tungod lang kay wa siya magdugo during sexual intercourse. Naa man ganiy mga angkan or kaduha na manganak nga magdugo pa during sex. Unsa man say labot nimo sa iyang kagahapon kon duna siyay relasyon kaniadto sa laing lalake ug nakuha ang iyang pagkababaye?
Kaluoy sa babaye kon imo lang higugmaon kay virgin siya. Di ra ba sab na sukdanan sa malipayong relasyon ug malungtaron nga kaminyuon. You look beyond just virginity kon relasyon man ang imong hisgutan. Tahuron mo kon kinsa siya, virgin man ang babaye or di. Daghan ra bang mga babaye nga nailad sa pasalig sa opportunist nga mga lalake mao nga ilang natugyan ang ilang kaugalingon. Nalabanan ra sa ilang pagsalig ug kabuotan, natugyan ang kaugalingon ngadto sa lalake.
Hinaot pa unta nga imong usbon nang imong prinsipyo sa pagpili og babaye. Ayaw na himoang dakong isyu diha sa imong kaugalingon. Mabaw ra kaayo na.
NOY KULAS
Gipatik sa mantalaang SuperBalita Cebu Hunyo 21, 2011. Linkback:
https://tubagbohol.mikeligalig.com/index.php?topic=41818.0