Win,
Tumana na lang ang gusto sa babaye kay sa imong ikompisal sa imong ig-agaw ang inyong gibuhat, magubot ug mahimong komplikado ang sitwasyon. Naay mga sekreto sa kinabuhi nga mas maayong magpabilin nga sekreto kay kon ibutyag, mas modako ang problema ug daghan na ang mangaangin. Kay kon imo nang ibutyag, nagtuo kang duyanon ka sa imong ig-agaw? Di kaha magubot ang inyong pamilya?
Putla ang inyong relasyon sa babaye. Mao nay labing maayo ninyong buhaton ug pagpalayo na nilang duha. Mas maayo gani nga human sa inyong panagbuwag, mo-explore ka og laing relasyon kay makatabang kini nimo kaayo nga makalimot nianang bayhana ug di sab sila mahibung nganong naglahi ka na. Kay lain nang change nga way rason nga makita, madudahan na hinuon ka.
Kinsa man ang amahan nianang bataa, palabya una ang panahon. Kon maliwat nimo, ikaw ang amahan. Apan kon maliwat sa imong cousin, siya ang papa. Ang labing maayo gyud nga determinant niana mao ang DNA testing apan mahal ang proseso. Unya mogasto ka aron lang mahibaw-an ikaw ang amahan? Basin mabuko na hinuon mo sa inyong tinago-tago nga relasyon.
Pangayo og pasaylo sa Ginuo sa imong gibuhat. Pag-usab na. Unya panamini ang sitwasyon sa imong cousin. Nga ang pagpanglimbong di diay maayo og linugdangan. Kagubot maoy sangkoan kay moabot man ang panahon nga kini mabutyag ra gyud kon di putlon samtang sayo pa.
Hinuktoki kini og maayo. Kon nagbasol ka na, ayaw na hasula pa ang imong konsensya. Ang importante nakapangayo ka og pasaylo sa Ginuo.
NOY KULAS
Gipatik sa mantalaang SuperBalita Cebu Oktubre 20, 2012.
Linkback:
https://tubagbohol.mikeligalig.com/index.php?topic=55958.0