SuperBalita Davao
Sunday, February 17, 2013
PATAY dayon ang usa ka lola kinsa miinom og pestisidyo alas 6:00 sa buntag niadtong Sabado.
Ang biktima mao si Ceding Butolan Ande, 64, biyuda, residente sa Sitio Egay, Barangay Biao Escuela, Tugbok District, siyudad sa Davao.
Saysay sa spot report sa Tugbok Police Station nga buntag sayo sa maong adlaw nag-inom ang biktima og ilimnong makahubog nga gisagulan ug 'thiodan' nga pestisidyo nga panghilo sa kuhol sa ilang basakan.
Suma sa anak nga lalaki sa biktima, Renato Ande, 39, nga naandan na nga magpunay og hubog ang iyang inahan tungod kay gibuwagan sa hinigugma.
Nasayran nga gikan sa pagkabiyuda sa biktima, duna kini lalaki nga gikarelasyon.
Gipasagdan na lamang sa mga anak ang biktima aron ilang mahatag ang kalipay sa inahan.
Tungod kay gibuwagan siya sa lalaki, nakahukom siyang magpakamatay mao nga miinom og hilo.
Gitabang dayon ang biktima sa mga miresponde nga personahe sa Central 911, apan gideklara siyang patay na.
Nakuha gikan sa nahitaboan ang usa ka botelya sa ilimnong makahubog, apan wala na nila nakita ang galon sa pestisidyo nga gigamit sa iyang pagpakamatay.
Linkback:
https://tubagbohol.mikeligalig.com/index.php?topic=79609.0