SuperBalita Cebu
Ni Dennes R. Tabar
Thursday, April 3, 2014
DI TANANG selfie nga maoy uso karon sa social networking sites maayo og sangputanan.
Labina kon ikaw gipaÂngita sa mga tinugyanan sa balaud kay maghatag kini og ideya kanila asa ka nagtago-tago.
Mao ni ang naamguhan sa giisip nga number 1 most wanted sa station-6 sa Mandaue City Police Office, kinsa nasikop tuÂngod sa iyang pag-selfie nga ang background mao ang imahen nga dako sa usa ka santos.
Ang imahen inila kaÂayo mao nga wa maglisod ang mga pulis sa pag-ila diin kini nga lugar.
Ang nahulog sa mga kamot sa kapulisan giila nga mao si Niño Cueva, 20, taga barangay Casili, dakbayan sa Mandaue, usa ka habal-habal driver.
Ang suspek nag-atubang og kasong abduction with rape in relation to Republic Act 7016 kun child abuse law.
Niadtong Mayo 2012, ang suspek gipasanginlang nga nilugos sa usa ka tinun-an sa high school nga iyang gidala sa kalibunan.
Ang biktima iyang pasahero, inay iyang iÂhaÂtod sa balay, gideritso kini niya sa pagdala sa kalibonan ug didto gipahimuslan ang menor de edad.
Si Cueva nalutsan og warrant of arrest nga giluwatan ni Judge Raphael Yrastorza tungod sa maong kaso.
Apan human sa hitabo, ang suspek nakasibat ug nagtago-tago.
Si Sr. Insp. Romel Luga, hepe sa Station 6, niingon nga way hunong ang ilang pagpangita sa suspek.
Sa dihang ilang nakit-an ang hulagway nga selfie sa Facebook tuÂngod sa iyang background, ilang nahibaw-an ang nahimutangan niini tuÂngod sa usa ka dakong rebolto sa santos.
Sa ilang gihimong pagtuon, ilang nasuta sa hulagway nga iya kini sa Shrine of Our Lady of the Miraculous Medal nga nahimutang sa Barangay Lapaz, siyudad sa Bogo.
Ang mao nga dapit inila kaayo.
Ang mga operatives sa Station 6, niadtong miaging adlaw, daling nihimog operation.
Ilang natultolan ang nahimutangan sa mga higala niini sa siyudad sa Bogo ug ilang naabtan sa usa ka internetan nga nag-abli pa sa Facebook.
Sa suspek gatingkagol karon sa Mandaue City Jail.
Linkback:
https://tubagbohol.mikeligalig.com/index.php?topic=78077.0
