Ni Guam P. Logroño
Saturday, May 5, 2012
IRING maoy gituohang nakaingon sa kamatayon sa duha ka mga batang managsuon human ang ilang balay naugdaw sa sunog niadtong Biyernes sa gabii sa Sitio Sinsin, Barangay Sam-ang, dakbayan sa Toledo.
Nangapaig ang managsuon nga sila si Alexander Borgador Jr., 2, ug Harvey, 5, human sa sunog nga gituohang nagagikan sa lampara nga natumba kay naambakan sa iring samtang ang mga bata nangatulog mga alas 10 sa gabii niadtong Biyernes.
Si SFO2 Constancio Alcover Jr., imbestigador sa Toledo City Fire Station nga nahinabi sa Sun.Star Superbalita, nagkanayon nga ang mga bata gibiyaan sa ilang inahan nga si Juvelyn, 23, samtang sila nangatulog.
Gi-lock sa inahan ang pultahan kay niapas sa iyang kapuyo nga si Alexander Sr., 26, jalousie installer, kay nagpalit og tuba sa tindahan nga may gilay-ong tunga sa kilometro.
Apan nakurat na lang ang managtiayon sa ilang pagbalik kay ang ilang mga silingan nagkatibuwaag sa pagpanagan kay dunay sunog sa unahan.
Sa ilang pagsusi, ang ilang balay naugdaw na diin didto ang ilang duha ka gagmay nga mga anak sa sulod.
“Mga anaaaak!†siyagit ni Alexander Sr. sa iyang pagkakita sa ilang balay nga naugdaw samtang si Juvelyn nakuyapan.
Pipila ka oras sa pagtalikod ni Juvelyn, si Elsa Basalo, iyang igsuon, nahigmata sa usa ka buto sa gawas.
“It sounded like a gunshot,†matod niya sa Cebuano sa interbyu sa Sun.Star Cebu.
Iyang gipukaw ang iyang kamaguwangan nga anak aron sirhan ang pultahan apan iyang nadunggan ang singgit sa iyang pag-umangkon nga si Harvey.
“Maaaa!,†kutlo ni Basalo sa siyagit sa iyang 5-anyos nga pag-umangkon.
Dali siyang nigawas sa balay ug nikaratil pagdagan sa ubos sa bungtod aron maabot ang balay sa iyang igsuon.
Nagsugod pagtapok ang ilang mga silingan apan way bisan usa nga nakadala og tubig kay ang tabay mga 200 metros ang gilay-on.
Naghilak na lang siyang nagtan-aw sa iyang pag-umangkon nga diha sa bintana dayon nakit-an niyang niisa kini sa iyang kamot dayong kahugno sa sawog nga iyang gibarugan.
Natabunan sila sa atop.
Si Alcover niingon nga ang inahan nibutyag nga naggamit lang silag sugang lampara, diin gibutang sa lamesa dihang gibiyaan ang duha ka mga anak nga nangatulog.
Nibutyag siya nga duna silay binuhing iro, ingon man iring, nga gikatahong kanunay mokatkat hinungdan nga maoy ilang gituohan nga hinungdan sa sunog.
“Sa akong initial nga pagsusi sa imbestigasyon dakog posibilidad nga ang iring maoy nakatumba sa lampara nga naambakan. Daling nikatap ang kayo sa light materials nga balay,†dugang ni Alcover.
Ang sunog gibanabanang nidanyos og P20,000.
Ang bana gikatahong nadugay kay dunay gika-estorya sa tindahan atol sa pagpalit niya og tuba, labot sa pagatrabahoon niining extension sa ilang balay. --Gipatik sa mantalaang SuperBalita Cebu Mayo 06, 2012.
Linkback:
https://tubagbohol.mikeligalig.com/index.php?topic=50058.0
