USA ka panday ang gipusil patay sa duha ka mamumuno samtang padung unta sa trabaho alas 7:30 kagahapon sa buntag, Biyernes.
Nahitabo ang insidente didto sa sa Garnet Street, RGA Village, Barangay Paciano Bangoy, siyudad sa Davao.
Ang biktima mao si Tomas Gellia, 31, residente sa Purok Sampaguita sa maong barangay.
Subay sa imbestigasyon sa Sta. Ana Police Station, nasayran nga samtang padung na unta sa trabaho si Gellia, kalit miduol kaniya ang duha ka mamumuno sakay sa usa ka blue nga Honda XRM.
Mition dayon og .45 nga kalibre sa pistola ang mga suspek kang Gellia ug gipusil siya makaunom ka higayon.
Ang biktima nahagba nga duna nay tulo ka igo sa bala sa ulo, likod ug sa hawak.
Nasayran gikan sa asawa sa biktima nga si Karina, 29, nga sa wala pa mahitabo ang pagpamusil patay, gikaaway nila ang alyas Toto Verano kinsa nautangan sa biktima nga kantidad og P2,500.
Sumala pa nga una nang mibahad si Verano nga patyon niya ang biktima kay wala mibayad sa utang.
Gisubay sa kapulisan ang gipuy-an ni Verano apan wala na kini sa iyang gipuy-an.
Suma sa nakasaksi sa hitabo, ang motor nga gisakyan sa mga suspek dunay plaka numero YF-5405.
Nakuha gikan sa nahitaboan ang upat ka basiyo sa bala sa .45 nga kalibre sa armas.
Sa pagkakaron, padayon pa ang gihimong imbestigasyon sa Sta. Ana police aron nga matumbok ang tinuod nga mga mamumuno ug madakpan tungod sa pagpatay sa biktima. --
http://www.sunstar.com.ph/superbalita-davao/Linkback:
https://tubagbohol.mikeligalig.com/index.php?topic=71346.0
