Nila ni Darrel Carumba ug Rey Pasaporte (Banat) Updated June 28, 2011 12:00 AM Comments (0)
CEBU, Philippines - Usa ka 62 anyos nga mag-uuma nahabwa ang tinai human kini tagod-tagora patay sa iyang pag-umangkon didto sa barangay Magsaysay, lungsod sa Balamban niadtong Domingo sa alas 5:00 sa hapon.
Ang biktima mao si Bernardo Nuya Panit, 62, minyo, mag-uuma, nga taga Sitio Capioan, barangay Magsaysay, samtang ang suspetsado mao ra usab ang iyang pag-umangkon nga si Roldan Bunghanoy, 27 anyos, minyo, nga silingan sa biktima.
Si PO2 Cesar Climaco sa Balamban Police Station mibutyag sa Banat News nga ang biktima ug ang suspek sa wala pa ang hitabo, nag-inom didto sa tabo sa barangay Tabunan sakop na sa dakbayan sa Sugbo.
Ang mga saksi nagkanayon nga samtang nangalasbag, nagkomed-yahanay pa ang duha hangtod nga nagkalalis kini nga misangpot sa init nga away.
Matud pa ni PO2 Climaco nga naundang ang inom sa duha ug unang mipauli ang suspetsado.
Ang biktima kinsa wala masayod nga giatangan diay siya sa suspetsado misunod usab og pauli dihang pag-abot niini sa awaaw nga dapit sa dalan, gipanigbas siya pinaagi sa pinute sa suspetsado, gitagod-tagod ang lawas niini hangtod nga namatay.
Midugang si PO2 Climaco nga ang laing pag-umangkon sa biktima nga si Lilito Panit Kalan, hingkod ang panuigon ang nakakita sa hitabo.
Mitug-an kini sa kapolisan nga bisan natumba na ang biktima padayon kining gipanigbas sa pinute sa suspetsado hinungdan nga natabas-tabas ang tiyan ug dughan lakip na ang ubang bahin sa kalawasan sa biktima.
Patay nang gibiyaan sa suspek ang biktima sa dalan ug ang kapolisan nay misakwat sa lawas patay sa biktima. (WC) (BANAT NEWS)
Linkback:
https://tubagbohol.mikeligalig.com/index.php?topic=41954.0
