SuperBalita Davao
Ni Jeepy P. Compio
Friday, July 4, 2014
USA ka lalaki ang gipaslak sa selda sa San Pedro Police Station ning siyudad sa Davao human niya gitaban ang usa ka menor de edad nga dalagita nga giingo’ng iyang gilumay.
Gipriso mao si Junry (bansagon gitago), 25, lumad nga taga Surigao del Sur.
Si Police Officer 3 (PO3) Rechelyn Bahan sa Women and Children's Protection Desk (WCPD) sa presinto dos nagbutyag nga nangayo'g tabang sa kapulisan ang ginikanan ni Ivy (bansagon gitago), 13, taga El Rio Vista, Barangay 19-B Poblacion, siyudad sa Davao, kay gitaban ang iyang anak sa suspek niadtong Hulyo 1, 2014.
Hilabihan ang kaguol sa ginikanan sanglit estudyante ang ilang anak kinsa tulo na ka adlaw nga wa miuli sa ilang balay.
Ang suspek nagbutyag nga upat na ka bulan ang ilang relasyon pinaagi sa text.
Nagkita sila niadtong Hunyo 30, 2014 nga mao ang adlaw nga nagkasabot sila ni Ivy nga moadto sa Surigao.
Giangkon sa suspek nga bisan di siya guwapong tawo, apan dihang nagkita sila sa dalagita, wa na mobuwag kaniya si Ivy.
Gipasiatab niya ang lumay nga iyang gihimo didto sa Surigao del Sur nga ginama sa lima ka dahon sa kamunggay nga giputos sa itom nga panapton.
"Nagkauyab mi sud sa upat ka bulan namo nga panag-text. Mao to nga nagpakita ko niya atong June 30. Miuban siya nako tungod sa power sa akong lumay," sulti ni Junry sa Superbalita kagahapon sud sa selda diin iyang gipakita ang lumay.
Giingon sab sa suspek nga human niya makuha ang pagkababaye sa biktima sud sa tulo ka adlaw didto sa Surigao, iya kining gibalik sa panimalay sa babaye alas 7:25 sa gabii, Huwebes, dala sa pagpamalaye kay buot niya kining minyoan.
"Nakuha gyud nako siya kada gabii, mao tong nadesisyonan namo nga magminyo mi, pero nasuko iyang ginikanan kay pangit daw kaayo ko, tapos bata pa iyang anak," saysay sa suspek.
"Wala gyud diay ayo ang lumay kay dali ra nahupas, kay pag-abot namo sa ilang balay, nilaban naman siya sa iyang papa," dugang sa suspek.
Ang suspek daling gipasakay sa mobile patrol sa presinto dos ug giandam ang kasong paglapas sa Republic Act 8353 kun Anti-Rape Law of 1997 ug Republic Act 7610 kun Child Abuse Law.
Linkback:
https://tubagbohol.mikeligalig.com/index.php?topic=78587.0
