Ni STEPHANIE V. BERGANIO
NAGHIKOT og pisi sa iyang liog ug wala nay kinabuhi nga napalgan ang usa ka ulitawo human naghikog sulod sa boarding house niini sa Barangay Poblacion, lungsod sa Claveria, Misamis Oriental.
Giila ang biktima nga si Johnrey Hintipunan.
Gibutyag ni Barangay Kapitan Moises Macabasa nga gikan ang biktima namisita sa uyab niini nga mabdos ning panahona ug sa pag-uli niini sa boarding house posibleng gihimo ang paghunos sa kinabuhi.
Napalgan usab ang suicide note niini nga miingon nga kung manganak iyang uyab nganlan lang kini sa iyang pangalan. Gawas sa hangyo, wala na kini lain pang gisulti diha sa sulat.
Matud ni Macabasa nga wala man usab nag-away si Johnrey ug uyab niini apan posibleng aduna kini gihambin nga laing problema.
Apan ang inahan sa biktima niasoy nga posibleng nabalaka kining mosulti kaniya sa iyang problema tungod kay didto kini misulti sa magulang niini nga buot niyang pakaslan ang iyang uyab ug daw posibleng nagduha duha ang biktima tungod kay kaslunon man niining bulana ang iyang magulang.
Dugang sa inahan nga dili man kini niya ikasuko kung magdesisyon kining magpakasal apan iya sab pasabton nga unahon sa nila ang magulang tungod kay nakaplano naman.
Daw andam usab unta sila nga mamalaye kung nagsulti lang kini sa iyang problema.
Ang miimbistigar nga polis gikan sa Claveria Police Station miingon nga walay nakitang foul play sa kamatayon sa ulitawo.
Gipatik sa mantalaang SuperBalita Cagayan de Oro Agosto 05, 2015.
Linkback:
https://tubagbohol.mikeligalig.com/index.php?topic=80689.0
