Ni STEPHANIE V. BERGANIO
WALAY identipikasyon sa lalaki nga gitabangan og kaon sa duha ka iho niadtong Martes sa udto sa kadagatan nga bahin sa dakbayan sa El Salvador, Misamis Oriental.
Gisaysay sa bantay dagat sa siyudad nga si Joel Caballa nga unang mitaho kanila ang duha ka mga mananagat nga nakamatikod sa naglutaw nga patayng lawas sa kadagatan apan daw dili madoulan tungod kay adunay presensya sa duha ka iho.
Tungod niini sakay sa pumpboat ilang gisusi ni Caballa uban sa mga kauban ang nahimutangan sa patay nga lawas nga naglutaw apan ilang namatikdan ang gamay nga iho nga naglibot sa patayng lawas.
Tungod niini ilang gisuwayan og abog ang gamayng iho apan nakurat sila dihang gikaon niini ang kamot ug duha ka mga tiil sa patay nga tao.
Taliwala niini gisuwayan pa nila og abog pag-usab apan nakurat na sila pag-ayo dihang mitunga ang laing usa ka iho nga gihulagway niining dako pa sa usa ka barel ug unang gikunis-kunis human niini deretsong gitukob ang nahibiling lawas sa patay hinungdan mibulag pa ang ulo.
Matud ni Caballa nga buot pa nila untang kuhaon ang nahibilin nga ulo nga naglutaw apan naglisod gyod sila sa pag-atraka tungod kay nabalaka nga basin iyabo ang ilang pumpboat ug mabiktima sa duha ka iho. Kalit usab mibalod og kusog ug mibalik og tunga ang iho ug gilamoy ang nahibilin nga ulo.
Gikasubo pag-ayo niini nga wala gyod nila masalbar ug makuha ang patay nga naglutaw nga imbes unta kuhaon aron maila, giunhan man sila sa duha ka iho. Dugang niini nga labihan gyod ilang kaluoy nga gibati sa ilang nasaksihan nga hitabo human sa paglamoy.
Sa pagsulat ning balita, wala pay identipikasyon ang biktima kinsa gitouhang gianod paingon sa kadagatan nga bahin.
Gipatik sa mantalaang SuperBalita Cagayan de Oro, Hulyo 30, 2015.
Linkback:
https://tubagbohol.mikeligalig.com/index.php?topic=80649.0
