Ni Flor V. Querubin
Saturday, November 26, 2011
GIDUNGGAB patay sa iyang kapuyo ang usa ka labandera nga nakaplagan sa iyang anak kagahapon sa buntag.
Ang text message nga “I love you†nga nabasahan sa lalakeng kapuyo sa cell phone sa biktima maoy sinugdanan sa pag-aslom sa ilang relasyon.
Ang 9 anyos nga anak nga lalake maoy unang nakadiskubre kagahapon sa alas 7:00 sa buntag sa iyang ang nagkadugo niya nga inahan nga nalup-og diha sa banig sa ilang gipuy-an sa Brgy. Basak, dakbayan sa Lapu-Lapu.
Base sa pasiunang imbestigasyon sa Crime Against Person’s Desk (CAPD) sa Lapu-Lapu City Police Office (LLCPO), nakaangkon og gamay nga samad dinuslakan diha sa tunga nga bahin sa dughan si Jennelyn Zozobrado, 26, labandera nga taga-Sityo BRC.
Ang suspek mao ang live in partner ni Zozobrado nga giila nga si Arvin Empanado, 31, usa ka barbero, kinsa wa na diha sa ilang gipuy-an.
Ang mga imbestigador nakahipos og 10 pulgadas nga gitas-on nga screwdriver nga aduna lama sa dugo nga gituohang maoy gigamit sa pagduslak sa biktima.
Nadapit ang pagtagad sa mga silingan sa dihang nangayo og pakitabang si Jun-Jun, tinun-an sa Grade III, anak ni Zozobrado sa iyang unang gikapuyo, sa dihang nakita niini ang iyang inahan nga patay na nga naglunang sa dugo.
Ang dugo nagtulo-tulo pa sa gawas sa balay sa dihang milapos sa gingi sa bungbong.
Nasuta sa kapulisan gikan sa mga silingan ug kabanay ni Empanado nga nagpunay og lalis o away ang duruha sud na sa pipila ka mga adlaw.
Gituohan nga selos maoy hinungdan sa away ilabi na kon manglaba sa laing balay ang biktima.
Si Empanado adunay gamay nga barbershop nga nahimutang diha ra usab sa silong sa ilang giabangan nga duha ka andana nga balay.
Sigun sa tabi-tabi sa mga silingan nga adunay gisultian ang biktima sa iyang plano sa pakigbuwag sa iyang kapuyo kay di na niya maagwanta ang pagpangulata niini.
Samtang ang manghod ni Empanado (nagdumili sa pagpa-ila) nitug-an nga kaniadto nasakpan sa suspek si Zozobrado nga adunay gika-iring iring gumikan sa nabasahan nga text message nga nagkanayon nga “I love youâ€.
Atol sa paghiling sa lawas sa biktima, usa ka gamay ug lawom nga samad diha sa dughan ang nakit-an.
Lain usab nga samad sa suwang niini nga gidudahang gihapsan og gahi nga butang.
Gipatik sa mantalaang SuperBalita Cebu Nobiembre 27, 2011. Linkback:
https://tubagbohol.mikeligalig.com/index.php?topic=44421.0
