DAVAO OCCIDENTAL -- Mitugpa sa tambalanan ang usa ka sakop sa Citizen Armed Forces Geographical Unit (Cafgu) sa 72nd Infantry Battalion (IB) human gibunalan og tubo sa iyang asawa.
Nahitabo ang insidente sud sa detachment sa Cafgu didto sa Sitio Balite, Barangay Mabila, lungsod sa Sarangani ning bag-ong probinsya, alas 10:00 sa buntag niadtong Dominggo.
Ang biktima nailhang si Ederio Tiawin, 40, minyo, kinsa gibunalan sa asawang si Janice, pulos molupyo sa lugar.
Gitataw ni Senior Police Office 1 (SPO1) Leonardo Sumangyay Jr., imbistigador sa Sarangani Police Station, migamit ang suspek og tubo nga 1.5 pulgadang dayametro ug 14 pulgada ang gitas-on sa pagbunal sa ulo sa biktima hinungdan nga miagas ang dugo.
Daling gitabang ang biktima padung sa Sarangani Municipal Hospital apan girekomenda nga ibalhin siya sa ospital sa General Santos City tungod kay talandugon ang iyang kahimtang.
Ang asawa dali hinuong nasikop sa kapulisan nga naghikay sa kasong frustrated parricide.
Gidason ni Sumangyay nga love triangle ang pabilo sa krimen human nasayran sa asawa nga dili diay siya ang forever sa iyang bana. (OB)
Gipatik sa mantalaang SuperBalita Davao Septembre 15, 2015.
Linkback:
https://tubagbohol.mikeligalig.com/index.php?topic=80980.0
