Ni Vincie L. Monterde
Thursday, January 3, 2013
NAMATAY ang usa sa duha ka mga tulisan nga niigo sa usa ka burger stall sa Barangay Poblacion, dakbayan sa Talisay kagahapon sa kaadlawon human ang tindero nisukol.
Ang tindero nga si Ambrosio Candule, 27, taga Barangay Tapul, nga maoy cook ug tigbantay sa Angel’s Burger, nag-andam sa giluto niyang mga burger dihang duha ka mga lalake nga sakay og motorsiklo niabot pasado alas 4 kagahapon sa kaadlawon.
Usa sa mga suspek nga nailhan nga si Jun Rey Escare, 20, nibunot sa iyang .38 kalibreng revolver ug nidiklarar og tulis.
Gimanduan ni Escare ang biktima nga ang kinitaan ra sa tindahan ang iyang tuyo nga itunol.
Sa kahadlok nga mapusilan, dali nga gibuksan ni Candule ang kahon nga gisudlan sa iyang halin ug higatag ngadto sa suspek.
Samtang gidawat sa suspek ang kuwarta, nakakita og higayon ang biktima sa pag-ilog sa armas ug gisuwayan sab sa pagpabuto ni Escare ang pusil apan nikagar.
Nikuha og kutsilyong slicer sa pan si Candule ug gidungÂgab si Escare sa iyang walang bukton.
Dihang nasamdan na, nabuhian na ni Escare ang armas ug nidagan balik sa iyang kauban nga nagsakay sa motorsiklo.
Human sa pagsibat sa mga tulisan, si Candule nagdagan paingon sa Talisay City Police Station ug gitaho ang insidente.
Bulontaryo sab siyang nitahan human niangkon nga nakadunggab sa usa sa mga tulisan.
Human sa usa ka oras, ang kapulisan sa Talisay nakadawat og tawag sa telepuno gikan sa Talisay District Hospital nga dunay tawo nga namatay nga ni0abot sa tambalanan kay dunay samad dinunggaban.
Si Candule niangkon nga ang namatay mao ang iyang nadunggaban.
Si SPO4 Daniel Tarucan maoy nangulo sa iyang kaubanan sa paghimo og manhunt operation batok sa kauban ni Escare.
Si PO3 Benedicto Lasque, imbestigador sa kaso, nibutyag nga si Escare, taga Barangay Cansojong, posibling gibiyaan sa iyang kauban dihang nakaangkon kini og samad dinunggaban sa iyang bukton.
Usa ka testigo ang nitaho nga nakakita siya sa pagÂlabay sa duha ka mga lalake sa Barangay Dumlog human sa nahitabong pagpanulis.
Gipatik sa mantalaang SuperBalita Cebu Enero 04, 2013.Linkback:
https://tubagbohol.mikeligalig.com/index.php?topic=64081.0
