SuperBalita Cagayan de Oro
Ni Stephanie Viovicente-Berganio
Wednesday, November 6, 2013
NAGTINGKAGOL karon sa Maharlika Detention Cell ang usa ka lalaki nga nasikop sa kapolisan human mangbiktima na usab unta niadtong Lunes sa usa ka laundry shop sa Barangay Carmen ning siyudad.
Giila ang suspetsado nga mao si Elmon Silposa, hingkod ang edad, lumad nga taga Bunawan, Agusan del Sur.
Si Police Senior Inspector Alfredo Ortiz, hepe sa Carmen Police Station, niingon nga niadtong Oktubre 30, nanulis si Silposa sa usa ka Travelers Den sa maong dapit ug giluba ang kahera mahatag lamang ang iyang gitinguhang kantidad.
Dali kining misibat ug nagtago-tago apan niadtong Lunes mibalik kini sa dapit ug miadto sa duol lamang nga laundry shop aron kuhaon unta ang iyang gipalabhan nga sapatos.
Apan usa ka empliyadong babaye, nga tagoan na lamang sa ngalan nga Janet, ang gitionan na usab niini og kutsilyo ug gipangayuan ug cellphone.
Gipugos pa niini pagpasulod sa pansayan nga gituohang gusto pa niining luguson. Maayo na lamang abtik nga nakatunaw si Janet og asido ug gisulod sa kabo dayon yabo sa nawong sa suspek.
Naigo ang mata ni Silposa ug nagsige kini og pamalikas. Dali dayon nga nakapangayo og tabang si Janet hinungdan na daling nakaresponde ang kapolisan.
Nasikop si Silposa ug gikatakdang mag-atubang kini og daghan nga mga kaso.
Hinuon dili grabe ang kadaot sa nawong niini tungod sa asido labina deretsong nahilam-osan niini og tubig.
Linkback:
https://tubagbohol.mikeligalig.com/index.php?topic=76551.0
